مەملەكەت باسشىسىنا وڭىرلەردە اتقارىلىپ جاتقان جۇمىستار تۋرالى، پرەزيدەنتتىڭ باستامالارى مەن ساياسي رەفورمالارىن حالىقتىڭ كەڭىنەن تالقىلاپ جاتقانى تۋرالى مالىمەت بەرىلدى، دەپ حابارلايدى Almaty-akshamy.kz اقوردا سايتىنا سىلتەمە جاساپ.
بەردىبەك ساپاربايەۆ ءوزى قىزمەت اتقارعان جامبىل وبلىسىندا ورىندالىپ جاتقان پرەزيدەنت تاپسىرمالارىنىڭ ناتيجەلەرىن كەڭىنەن باياندادى. اتاپ ايتقاندا، ازاماتتاردىڭ تۇرمىس ساپاسىن ارتتىرۋعا، قوعامنىڭ ىنتىماعى مەن بىرلىگىن نىعايتۋعا باعىتتالعان «اسار»، «تۋعان جەرگە تاعزىم»، «جومارت تۇلەك» جانە «بەيبىتشىلىك پەن كەلىسىم» جوبالارى جايلى ايتىلدى. سونىمەن قاتار جامبىل وڭىرىندە جۇزەگە اسىرىلعان پيلوتتىق جوبا تۋرالى مالىمەت بەرىلدى. بۇل باستامالار ءاربىر وتباسىنىڭ ءوزىن-وزى اسىراۋىنا جاعداي جاساۋعا نەگىزدەلگەن.
بەردىبەك ساپاربايەۆ قاسىم-جومارت توقايەۆقا قۋاڭشىلىق جاعدايىندا اۋىل شارۋاشىلىعىن السىرەتىپ الماي، ودان ءارى دامىتۋ جونىندە، سونداي-اق جەرگىلىكتى بيلىك پەن اتا-انالاردىڭ بىرلەسە وتىرىپ، بالالاردى ەڭبەككە باۋلۋ ءىسىن قولعا الۋ تۋرالى ۇسىنىستارىن ايتتى.
كەزدەسۋ بارىسىندا جاستار اراسىنداعى جۇمىسسىزدىقتى شەشۋ ماسەلەسى دە تالقىلاندى.