تاۋەلسىزدىك - ءبىزدىڭ ەڭ قاستەرلى قۇندىلىعىمىز. ەگەمەندىك - ەلىمىز ءۇشىن جالاڭ ۇران مەن جالىندى ءسوز ەمەس. بۇل تۋرالى مەملەكەت باسشىسى قاسىم-جومارت توقايەۆ قازاقستان حالقىنا جولداۋى بارىسىندا ايتتى، دەپ حابارلايدى almaty-akshamy.kz
«بيىل ەگەمەن ەل بولعانىمىزعا 30 جىل تولىپ وتىر. تاۋەلسىزدىك - ءبىزدىڭ ەڭ قاستەرلى قۇندىلىعىمىز. قازاقستان تۇڭعىش پرەزيدەنتىمىز – ەلباسىنىڭ دارا ساياساتىنىڭ ارقاسىندا تابىستى ەل رەتىندە بۇكىل الەمگە تانىمال بولدى. ەڭ باستى جەتىستىگىمىز - ءبىرتۇتاس ەل بولىپ، جاڭا مەملەكەت قۇردىق. ىرگەمىزدى بەكىتىپ، ەڭسەمىزدى تىكتەدىك. حالىقارالىق قاۋىمداستىقتىڭ بەلدى مۇشەسىنە اينالدىق. تۇراقتى قوعام قالىپتاستىرىپ، ورنىقتى دامۋ جولىنا تۇستىك. مەملەكەتتىلىگىمىزدى نىعايتۋ ءۇشىن ءبىر ەل بولىپ، ەڭبەك ەتىپ جاتىرمىز. ەگەمەندىك - ەلىمىز ءۇشىن جالاڭ ۇران مەن جالىندى ءسوز ەمەس. ءبىز ءۇشىن ەڭ ماڭىزدىسى - ءار ازاماتتىڭ تاۋەلسىزدىك يگىلىگىن سەزىنە الۋى. ونىڭ باستى كورىنىسى - ەلدەگى بەيبىت ءومىر، قوعامداعى تۇراقتىلىق پەن تىنىشتىق. سونداي-اق حالىقتىڭ تۇرمىس ساپاسىنىڭ جاقسارۋى جانە جاستاردىڭ بولاشاققا نىق سەنىممەن قاراۋى. بارلىق باستامامىز وسىعان باعىتتالۋدا»، – دەدى قاسىم-جومارت توقايەۆ.