قاسىم-جومارت توقايەۆ وزبەكستانعا جۇمىس ساپارى بارىسىندا پرەزيدەنت شاۆكات ميرزيويەۆپەن بىرگە ەجەلگى حيۋا شاھارىنىڭ تاريحي ورتالىعىنداعى «يشان-قالا» قالاشىعىنا باردى، دەپ حابارلايدى اlmaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
«يشان قالا» يۋنەسكو-نىڭ دۇنيەجۇزىلىك مۇرالار تىزىمىنە ورتالىق ازيادان ەنگەن العاشقى ەسكەرتكىش سانالادى. مەملەكەتتىك تاريحي-ارحەولوگيالىق مۋزەي-قورىعىندا 400-گە جۋىق تۇرعىن ءۇي عيماراتى، سونداي-اق الپىسقا تارتا تاريحي جانە ساۋلەت ەسكەرتكىشى ورنالاسقان.
مەملەكەتتەر باسشىلارىنىڭ قالاشىققا ەكسكۋرسياسى «اتا داربازا» قاقپاسىنان باستالدى. مارتەبەلى مەيماننىڭ قۇرمەتىنە وراي وزبەك حالقىنىڭ ان-كۇيى شىرقالىپ، تەاترلاندىرىلعان كورىنىس قويىلدى.
ودان ءارى ولار «كۋنيا ارك» كەشەنىن، شەرعازى حان مەدرەسەسىن، مۇحاممەد ءامين يناق مەدرەسەسىن، جۇما مەشىتىن جانە «تاش حاۋلي» كەشەنىن ارالاپ كوردى.
قازاقستان مەن وزبەكستان پرەزيدەنتتەرى حيۋانىڭ ورتاعاسىرلىق شايىرى، اعارتۋشى، سوپى ءارى ويشىل پالۋان ماحمۇد (1247-1326) كەسەنەسىنە زيارات جاساپ، ونىڭ رۋحىنا قۇران باعىشتادى. پالۋان ماحمۇد كەسەنەسى وزبەك، تۇرىكمەن، قاراقالپاق جانە باسقا دا حالىقتاردىڭ ءمىناجات ەتىپ باراتىن قاسيەتتى مەكەنى سانالادى.
سونداي-اق قاسىم-جومارت توقايەۆ پەن شاۆكات ميرزيويەۆ حورەزم ساۋلەت ونەرىنىڭ بىرەگەي ەسكەرتكىشى – نۇروللا باي سارايىنا باردى.
ساراي-ساياباق كەشەنىن XIX عاسىردىڭ باس كەزىندە II مۇحاممەد راحىم حان ءوزىنىڭ ۇلى – حان تاعىنىڭ مۇراگەرى اسفەنديارعا ارناپ، حيۋالىق باي كوپەس نۇروللانىڭ يەلىگىندەگى ۇلكەن باقتىڭ ورنىنا سالدىرعان. قۇرىلىسقا حيۋالىق شەبەرلەر مەن سۋرەتشىلەردەن بولەك، رەسەيدەن جانە گەرمانيادان ماماندار الدىرعان. ءداستۇرلى شىعىس ساۋلەتى ونەرى مەن ەۋروپالىق ءستيلدىڭ ادەمى ۇيلەسىمى نىساننىڭ كەلبەتىنەن دە كورىنىپ تۇرادى.
ەكى ەل باسشىلارى حيۋا حاندىعىنىڭ باس ءۋازىرى بولعان سەيىت يبراگيم قوجانىڭ ءۇيىن، «بەش حاۋلي» كەشەنىن، سارايداعى باسقا دا بولمەلەردى، قوناق كۇتەتىن ءۇي-جايلاردى ارالاپ كوردى.
سودان سوڭ پرەزيدەنتتەر «وزبەك-قازاق سۋرەتشىلەرىنىڭ تۋىندىلارىنداعى حالىقتار بىرلىگى» بەينەلەۋ ونەرى كورمەسىن، «XIX-XX عاسىرلاردا تۇسىرىلگەن فوتوسۋرەتتەردەگى حورەزم» كورمەسىن، سونىڭ ىشىندە وزبەك ۇلتتىق فوتوونەرى مەن دەرەكتى كينوسىنىڭ نەگىزىن قالاۋشى قۇدايبەرگەن ديۋانوۆتىڭ سۋرەتتەرىن تاماشالادى.