مەملەكەت باسشىسى قازاقستاندىقتاردى ورازا ايت مەرەكەسىمەن قۇتتىقتادى
مەملەكەت باسشىسى قاسىم-جومارت توقايەۆ قازاقستاندىقتاردى ورازا ايت مەرەكەسىمەن قۇتتىقتادى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
«ءقادىرلى وتانداستار!
بارشاڭىزدى ورازا ايت مەرەكەسىمەن شىن جۇرەكتەن قۇتتىقتايمىن!
بۇل – كۇللى مۇسىلمان قاۋىمىنىڭ ۇلىق مەيرامى. ورازا ۇستاعان جاماعات وسى مەرەكەنى اسىعا كۇتەدى. الىس-جاقىن اعايىن ءبىر-بىرىنىڭ ۇيىنە بارىپ، جىلى لەبىزىن بىلدىرەدى. حالقىمىزدىڭ ىنتىماعى نىعايىپ، بىرلىگى بەكي تۇسەدى.
يسلام – يماندىلىقتى، بەيبىتشىلىكتى، مەيىرىمدىلىكتى دارىپتەيتىن اسىل ءدىن. وسى يگى قۇندىلىقتار ەلدىڭ اماندىعى مەن بەرەكەسىن تىلەيتىن ۇلتىمىزدىڭ سالت-داستۇرىمەن بىتە قايناسىپ جاتىر. سوندىقتان بۇل – ءبىر شاڭىراقتا ءتاتۋ-تاتتى ءومىر ءسۇرىپ جاتقان بارشا جۇرتىمىز ءۇشىن ءقادىرلى ۇعىمدار.
ورازا ايت – ەلدىگىمىزدى ەسەلەيتىن مەرەكە. ءبىز مەملەكەتىمىزدىڭ جارقىن بولاشاعى ءۇشىن قوعامداعى بىرلىك پەن كەلىسىمدى ودان ءارى نىعايتا بەرەمىز.
ەلىمىزدىڭ ءار شاڭىراعى باقىت پەن قۋانىشقا بولەنسىن!
حالقىمىزدىڭ ىرىسى مەن ىنتىماعى ارتا بەرسىن!
ايت قابىل بولسىن، اعايىن!» - دەدى قاسىم-جومارت توقايەۆ.