باستى ماقساتىمىزدىڭ ءبىرى – قوعامدا وركەنيەتتى ساياسي ءداستۇردى ورنىقتىرۋ. ول ءۇشىن جوعارى ساياسي جاۋاپكەرشىلىك مادەنيەتىن قالىپتاستىرۋىمىز كەرەك. پرەزيدەنت قاسىم-جومارت توقايەۆ پارلامەنت سەناتىنىڭ وتىرىسىندا وسىنداي پىكىر ءبىلدىردى، دەپ حابارلايدى اقوردانىڭ باسپا ءسوز قىزمەتى.
ق ر پرەزيدەنتى كونستيتۋسيالىق رەفورما ەلىمىزدىڭ ساياسي جۇيەسىن ەۆوليۋسيالىق جولمەن دامىتۋعا جول اشقانىن اتاپ ءوتتى.
«باستى ماقساتىمىزدىڭ ءبىرى – قوعامدا وركەنيەتتى ساياسي ءداستۇردى ورنىقتىرۋ. ول ءۇشىن جوعارى ساياسي جاۋاپكەرشىلىك مادەنيەتىن قالىپتاستىرۋىمىز كەرەك. ونسىز تۇراقتى ءارى جان-جاقتى دامۋ مۇمكىن ەمەس. رەفەرەندۋمدا حالىقتىڭ قولداۋىنا يە بولعان كونستيتۋسيالىق رەفورمانى جاڭا ساياسي ءداۋىردىڭ باستاۋى دەۋگە بولادى. بۇل وزگەرىستەر ەلىمىزدىڭ ساياسي جۇيەسىن ەۆوليۋسيالىق جولمەن دامىتۋعا جول اشتى. ادىلدىك، اشىقتىق جانە شىنايى باسەكە رەفورمالاردىڭ نەگىزگى ارقاۋىنا اينالدى»، - دەدى قاسىم-جومارت توقايەۆ.
سونداي-اق، پرەزيدەنت الدا ءالى دە اۋقىمدى جۇمىس بارىن اتاپ ءوتتى.
«ەلىمىزدە «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتى ورنىعا ءتۇستى. بۇل رەفورمالار بيلىك ينستيتۋتتارى جۇيەسىنىڭ تەپە-تەڭدىگىن قالىپتاستىرادى. ەلدەگى ساياسي ۇدەرىسكە ازاماتتاردىڭ قاتىسۋىنا جول اشادى. سونداي-اق، مەملەكەتتىك باسقارۋ جۇيەسىنىڭ تيىمدىلىگىن ارتتىرا تۇسەدى. ءبىزدىڭ وسى باستامالارىمىزعا قوعام وكىلدەرى قولداۋ ءبىلدىردى. اۋقىمدى جاڭعىرتۋ جۇمىسىن جۇرگىزۋگە مۇمكىندىك تۋدى. سونىڭ ارقاسىندا بىرنەشە جىلدا ايتارلىقتاي ناتيجەگە قول جەتكىزدىك. ءبىراق، ءبىز مۇنىمەن توقتاپ قالمايمىز. الدا ءالى اۋقىمدى جۇمىس بار»، - دەدى مەملەكەت باسشىسى.