ءبىزدىڭ «ءارتۇرلى كوزقاراس، ءبىرتۇتاس ۇلتقا» نەگىزدەلگەن قاعيداتىمىز مىزعىمايدى. ساياسي راديكاليزم مەن ەكسترەميزمنىڭ كەز كەلگەن تۇرىنە ەلىمىزدە ورىن جوق. بۇل تۋرالى پرەزيدەنت قاسىم-جومارت توقايەۆ سەنات وتىرىسىندا ايتتى، دەپ حابارلايدى اlmaty-akshamy.kz.
«دەموكراتيا – بۇل، ەڭ الدىمەن، ءوز ءسوزىڭ مەن ىسىڭە جاۋاپكەرشىلىكپەن قاراۋ. ءبارىمىز ءبىر شاڭىراق استىندا ءومىر ءسۇرىپ جاتىرمىز. سوندىقتان ءاربىر ازامات، كەز كەلگەن قوعام قايراتكەرى، بارشا ساياسي كۇش ەل بولاشاعى ءۇشىن ءوزىنىڭ تىكەلەي جاۋاپكەرشىلىگىن سەزىنۋى قاجەت. بارشا وتانداستارىما ايتارىم: الەمدە بۇرىن-سوڭدى بولماعان كۇردەلى گەوساياسي احۋال كەزىندە ەلىمىزدىڭ تىنىشتىعى مەن ىرىس-بەرەكەسىن ساقتاۋ تەك وزىمىزگە، بىرلىگىمىز بەن ىنتىماعىمىزعا بايلانىستى. تاۋەلسىزدىگىمىزدى ساقتاۋ جانە ونى نىعايتۋ اسا ماڭىزدى مىندەت ەكەنىن تاعى دا ەسكە سالامىن. بۇل – حالقىمىزدىڭ باستى قۇندىلىعى»، - دەدى مەملەكەت باسشىسى.
ونىڭ ايتۋىنشا، ءبىز كونسترۋكتيۆتى رەفورما باعىتىمەن العا قاراي نىق قادام باسىپ، مەملەكەتتىلىگىمىزدى نىعايتىپ، قوعامدى بىرىكتىرۋ ءۇشىن قولدان كەلگەننىڭ ءبارىن جاساۋىمىز كەرەك. ساياسي جاۋاپكەرشىلىكتىڭ بيىك مادەنيەتى مەن ازاماتتارىمىزدىڭ شىنايى ءپاتريوتيزمى مۇنىڭ كەپىلى بولا الادى. ءارقايسىمىز ءوزارا تىلەۋلەستىك قاعيداتىنان اينىماۋىمىز كەرەك. سوندا عانا تەڭ مۇمكىندىكتەر مەن دامۋدى تۋ ەتكەن ادىلەتتى قازاقستاندى قۇرامىز.
«بىرنەشە اپتادان كەيىن ساياسي ناۋقان باستالادى. كانديداتتار ۇگىت-ناسيحات جۇمىسىنا كىرىسەدى. ولار داۋىس جيناۋ ءۇشىن ءتۇرلى تاسىلدەردى قولدانادى. بۇل – قالىپتى دەموكراتيالىق ۇدەرىس. قازاقستاندا پىكىر الۋاندىعىنا ەشقانداي شەكتەۋ قويىلمايدى. زاڭعا قايشى كەلمەيتىن بارلىق ىس-ارەكەتكە رۇقسات بەرىلەدى. دەگەنمەن، ءبىر نارسەنى ءبارىمىز قاپەردە ۇستاۋىمىز كەرەك. سايلاۋ ەلدى بولەتىن ەمەس، بىرىكتىرەتىن ناۋقان بولۋى كەرەك. تاعى دا ايتقىم كەلەدى: ۇمىتكەرلەر قوعامعا ىرىتكى سالاتىن ارەكەتتەن اۋلاق بولعانى ءجون. اڭداماي ايتىلعان ارتىق ءسوز نەمەسە ويلانباي جاسالعان وقىس قادام بۇكىل ەلدىڭ بولاشاعىنا كەسىرىن تيگىزەدى. ءاربىر وتانداسىمىز وسىنى دۇرىس تۇسىنۋگە ءتيىس»، - دەدى قاسىم-جومارت كەمەل ۇلى.