"مەنىڭ باستى ماقساتىم – ەكونوميكادا بولسىن، ساياساتتا بولسىن، مونوپوليانى مەيلىنشە جويۋ". بۇل تۋرالى «QAZAQSTAN» ۇلتتىق تەلەارناسىنداعى سۇحباتى كەزىندە مەملەكەت باسشىسى قاسىم-جومارت توقايەۆ ءمالىم ەتتى، دەپ حابارلايدى اlmaty-akshamy.kz
«سوڭعى كەزدە وليگوپوليا دەگەن تەرميندى كوپ پايدالانىپ ءجۇرسىز. ەندى ونى كوپشىلىك ءالى تۇسىنە قويعان جوق. ءدۇيىم جۇرتتىڭ ءبارى ونى تولىعىمەن تۇسىنەدى دەپ ايتۋ قيىن. تۇپتەپ كەلگەندە، بۇل ءسوزدىڭ ماعىناسى نەدە؟ سونى ايتىڭىزشى؟»، - دەپ سۇرادى ءتىلشى.
وسى ورايدا پرەزيدەنت «وليگوپوليا» بۇل ەكونوميكا سالاسىنداعى سانى شەكتەۋلى ادامداردىڭ ۇستەمدىگىن بىلدىرەتىنىن ايتا كەلە، بىزدە وسىنداي ءۇردىس بەلەڭ الىپ جاتقانىن، كوپشىلىك، اسىرەسە، كاسىپكەرلەر ونى جاقسى بىلەتىنىن اتاپ ءوتتى.
«بۇل شىنايى باسەكەگە، جالپى ايتساق، ادىلەتتىلىككە كەدەرگى بولىپ وتىر. وسى ماسەلەنى شەشپەسەك، ەكونوميكامىز دامىمايدى، ىشكى ساياسي احۋال مۇلدەم ناشارلاپ كەتەدى. سوندىقتان مەنىڭ باستى ماقساتىم – ەكونوميكادا بولسىن، ساياساتتا بولسىن مونوپوليانى مەيلىنشە جويۋ. ودان ءبىرجولا قۇتىلعان ءجون. بۇل، ارينە، وڭاي ەمەس، ءبىراق مىندەتتى تۇردە وسى جۇمىسقا كىرىسۋىمىز كەرەك. باسقا جول جوق»، - دەدى قاسىم-جومارت توقايەۆ.