كۇردەلى ساتتە جۇمىلىپ جۇمىس ىستەۋ كەرەك.
ۇكىمەتتىڭ كەڭەيتىلگەن وتىرىسىن قورىتىندىلاعان پرەزيدەنت قاسىم-جومارت توقايەۆ مەملەكەتتىك اپپاراتقا جۇمىلىپ جۇمىس ىستەۋدى تاپسىردى، دەپ حابارلايدى Almaty-akshamy.kz قازاقپارات cايتىنا سىلتەمە جاساپ.
«مەملەكەتتىك قىزمەتشىلەر وسىناۋ ەلىمىز ءۇشىن كۇردەلى ساتتە جۇمىلىپ جۇمىس ىستەۋ كەرەك. سىزدەرگە باستامالار كوتەرىپ، قاجەت كەزىندە شۇعىل شەشىم قابىلداي الاتىن قابىلەت تانىتۋ كەرەك. باستاما ايتپايتىن، نەمقۇرايدى شەنەۋنىكتەر بىزگە كەرەك ەمەس»، - دەدى مەملەكەت باسشىسى.
پرەزيدەنت قۇقىق قورعاۋ ورگاندارىنا جەمقورلىقپەن كۇرەستە وبەكتيۆتى بولۋدىڭ ماڭىزى زور ەكەنىن باسا ايتتى.
«قۇقىق قورعاۋ ورگاندارى مەملەكەتتىك اپپاراتتىڭ جۇمىسىنان سىبايلاس جەمقورلىقتى انىقتاۋ كەزىندە قىراعىلىق، جەدەلدىك، وبەكتيۆتىلىك تانىتۋى كەرەك. شىن كىنالىلەردى زاڭ بويىنشا جازالاۋ قاجەت. مەملەكەتتىك ساتىپ الۋلارعا ەرەكشە نازار اۋدارعان ءجون. بۇل سالا ءالى دە بولسا اشىق بولماي تۇر. جول جانە باسقا دا قۇرىلىس تۇرلەرىندە لاۋازىمدى تەرىس پايدالانۋ ماسەلەسىنە، اسىرەسە، ءىرى جانە ورتا ينفراقۇرىلىمدىق جوبالارعا وسىنداي نازار اۋدارۋ كەرەك. ءبىر سوزبەن ايتقاندا، سىبايلاس جەمقورلىقپەن جۇيەلى، ءبىرىزدى كۇرەس ءبىزدىڭ مىزعىمايتىن باسىم باعىتىمىز بولىپ قالۋى ءتيىس. مەملەكەتتىك اپپارات جيناقى بولۋى كەرەك جانە ناتيجەگە باعدارلانعان بولۋى قاجەت»، - دەدى قاسىم-جومارت توقايەۆ.