قاسىم-جومارت توقايەۆ ءباا پرەزيدەنتىن قازاقستانعا ساپارمەن شاقىردى

ق ر ءسىم باسپا ءسوز قىزمەتىنەن ءمالىم ەتكەندەي، م.نۇرتىلەۋ ءوز ارىپتەسىن دۋباي قالاسىندا 30 قاراشا مەن 12 جەلتوقسان ارالىعىندا ءوتىپ جاتقان بۇۇ-نىڭ كليماتتىڭ وزگەرۋى تۋرالى نەگىزدەمەلىك كونۆەنسياسىنا قاتىسۋشى مەملەكەتتەردىڭ COP28 كونفەرەنسياسىن ءساتتى ۇيىمداستىرۋىمەن قۇتتىقتادى. سونداي-اق قازاقستان مەن امىرلىكتەردىڭ كليماتتىڭ وزگەرۋىمەن كۇرەستەگى كوشباسشىلىق ساياساتىن اتاپ ءوتىپ، ەلدەرىمىزدىڭ حالىقارالىق باستامالارى مەن ۇلتتىق مىندەتتەمەلەرىنىڭ جوعارى ماڭىزىنا توقتالدى.

ەكىجاقتى ىنتىماقتاستىقتى تالقىلاۋ كەزىندە م.نۇرتىلەۋ امىرلىكتەر قازاقستاننىڭ وڭىردەگى اسا ماڭىزدى سەرىكتەسى ەكەنىن جانە ەلدەرىمىزدى ءداستۇرلى باۋىرلاستىق قاتىناستار بايلانىستىراتىنىن ايتتى.

«تاراپتار ق ر پرەزيدەنتى قاسىم-جومارت توقايەۆتىڭ اعىمداعى جىلدىڭ قاڭتار ايىندا ابۋ-دابيگە جاساعان رەسمي ساپارى اياسىندا قول جەتكىزىلگەن ۋاعدالاستىقتاردىڭ ىسكە اسىرىلۋ بارىسىن قاراستىرىپ، ەكى مەملەكەت باسشىلارىنىڭ جاقىن ساياسي ديالوگىنىڭ قازاقستان-امىرلىكتەر كوپسالالى قارىم-قاتىناستارىنىڭ جەمىستى دامۋىنداعى شەشۋشى ماڭىزىمەن كەلىستى»، – دەلىنگەن سىرتقىساياسات ۆەدومستۆوسىنىڭ مالىمەتىندە.

قازاقستان ءسىم باسشىسى امىرلىك ارىپتەسىنە ق ر مەملەكەت باسشىسىنىڭ ءباا پرەزيدەنتى شەيح مۇحاممەد بەن زايد ءال ناحاياننىڭ اتىنا 2024 جىلى وتەتىن استانا حالىقارالىق فورۋمىنا شاقىرۋ حاتىن تابىستاپ، ونىڭ بۇل ءىس-شاراعا قاتىسۋىن ەلىمىزگە رەسمي ساپارىمەن ۇشتاستىرۋ مۇمكىندىگىن اتاپ ءوتتى.

«كەزدەسۋدە سوڭعى جىلدارى دامىپ كەلە جاتقان ينۆەستيسيالىق جانە تەحنولوگيالىق ىنتىماقتاستىقتى قولداۋ مەن ساۋدا-ەكونوميكالىق بايلانىستاردى ۇلعايتۋعا باسا نازار اۋدارىلىپ، تاراپتار ەكىجاقتى ساۋدا كولەمىن 1 ملرد اقش دوللارىنا جەتكىزۋ ءۇشىن قولدا بار الەۋەتتى بارىنشا پايدالانۋعا كەلىستى.

وسى ماقساتقا جەتۋ ءۇشىن مينيسترلەر ەكى ەلدىڭ استانالارى اراسىندا تىكەلەي اۋە قاتىناسىن اشۋ قاجەتتىگىن اتاپ ءوتتى جانە «Etihad Airways» پەن «Air Arabia» كومپانيالارىنىڭ رەيستەرىن اشۋ مۇمكىندىكتەرىن زەردەلەۋگە ۋاعدالاستى»، - دەلىنگەن حابارلامادا.

كەزدەسۋ سوڭىندا م.نۇرتىلەۋ شەيح ابداللانى كەلەسى جىلى رەسمي ساپارمەن استاناعا كەلۋگە شاقىردى.