قازاقستان پرەزيدەنتى قاسىم-جومارت توقايەۆ Qasr Al Shatie سارايىندا بىرىككەن اراب امىرلىكتەرىنىڭ پرەزيدەنتى شەيح مۇحاممەد بەن زايد ءال ناحايانمەن كەزدەستى.
مەملەكەت باسشىسى كورسەتكەن سىي-قۇرمەتى مەن قوناقجايلىعى ءۇشىن ءباا پرەزيدەنتىنە ريزاشىلىعىن جەتكىزىپ، «ابۋ ءدابيدىڭ ورنىقتى دامۋ اپتالىعىنىڭ» ءساتتى وتۋىنە تىلەكتەستىك ءبىلدىردى، دەپ حابارلايدى aqshamnews.kz.
قاسىم-جومارت توقايەۆ 2023 جىلى شەيح مۇحاممەد بەن زايد ءال ناحايانمەن ابۋ دابيدە جانە دۋبايدا وتكەن كەزدەسۋلەردى ىقىلاسپەن ەسكە الىپ، كەلىسسوزدەر ناتيجەسى ەكىجاقتى قاتىناستارعا تىڭ سەرپىن بەرگەنىنە ءارى ىقپالداستىقتىڭ جاڭا باعىتتارىنا جول اشقانىنا نازار اۋداردى.
– ءباا – ءبىزدىڭ اراب الەمىندەگى باستى سەرىكتەسىمىز. ەلدەرىمىزدىڭ يگىلىگى ءۇشىن ەكىجاقتى جانە كوپجاقتى بايلانىستاردىڭ بارلىق باعىتى بويىنشا تىعىز ىنتىماقتاستىق قۇرۋعا نيەتتىمىز. مەن دوستىق، ءوزارا سەنىم مەن قۇرمەتكە نەگىزدەلگەن ستراتەگيالىق سەرىكتەستىگىمىزدى نىعايتۋعا ءسىزدىڭ قوسقان ۇلەسىڭىزدى جوعارى باعالايمىن. اسا مارتەبەلى پرەزيدەنت مىرزا، ءسىزدى ءوز ەلىمدە قۇشاق جايا قارسى الۋعا دايىنمىن. قازاقستانعا جاسايتىن ساپارىڭىز ەكىجاقتى ىنتىماقتاستىقتى نىعايتۋدىڭ جاڭا كەزەڭىنە باستاۋ بولاتىنىنا سەنىمدىمىن، – دەدى مەملەكەت باسشىسى.
پرەزيدەنت بۇگىندە ءباا ەلىمىزدىڭ ەكونوميكاسىنا قارجى قۇيعان ون ءىرى شەتەلدىك ينۆەستوردىڭ قاتارىنا كىرەتىنىن اتاپ ءوتتى.
– بىلتىر باا-دەن كەلگەن تىكەلەي ينۆەستيسيا كولەمى ەكى ەسەگە ۇلعايدى. ابۋ دابيدەگى كەزدەسۋ بارىسىندا ءبىز تاۋار اينالىمىن 1 ميلليارد دوللارعا جەتكىزەمىز دەپ ماقسات قويدىق. ەكى ەل ۇكىمەتتەرى ساۋدا-ساتتىقتىڭ وڭ قارقىنىن قالىپتاستىرۋ ءۇشىن ناقتى ەكونوميكالىق كۇن تارتىبىنە ءمان بەرگەنى ءجون. ستراتەگيالىق ينۆەستيسيالىق جوبالاردى قۇرۋ تۋرالى بىرلەسكەن دەكلاراسيانى جۇزەگە اسىرۋعا ءسىزدىڭ تاراپىڭىزدان قولداۋ كورسەتىلەدى دەپ سەنەمىز. بۇل قۇجات اياسىندا امىرلىكتەردىڭ كومپانيالارىمەن كولىك-لوگيستيكا، ەنەرگەتيكا، قارجى، تۋريزم جانە باسقا دا كوپتەگەن سالادا بەلسەندى ىنتىماقتاستىق جۇرگىزىپ كەلەمىز. بۇل سەرىكتەستىك ەلدەرىمىزدىڭ وسىپ-وركەندەۋىنە سەپتىگىن تيگىزەدى، – دەدى قاسىم-جومارت توقايەۆ.
ءوز كەزەگىندە شەيح مۇحاممەد بەن زايد ءال ناحايان «ابۋ ءدابيدىڭ ورنىقتى دامۋ اپتالىعى» سامميتىنە قاتىسۋعا كەلگەنى ءۇشىن قاسىم-جومارت توقايەۆقا العىس ايتتى. سونداي-اق ەكى ەلدىڭ ىنتىماقتاستىعىن جوعارى باعالاپ، قازاقستانمەن اراداعى ساياسي ديالوگ پەن ەكونوميكالىق بايلانىستاردى ودان ءارى كەڭەيتۋدىڭ جانە بۇعان دەيىن قول جەتكىزىلگەن ۋاعدالاستىقتاردى تولىق جۇزەگە اسىرۋدىڭ ماڭىزىنا توقتالدى. ءباا پرەزيدەنتى قازاقستان مەن امىرلىكتەر اراسىنداعى بايلانىس 2025 جىلى ءوزارا ءتيىمدى ىنتىماقتاستىقتىڭ جاڭا دەڭگەيىنە كوتەرىلىپ، ەكى ەلدىڭ دامۋى مەن وركەندەۋىنە ىقپال ەتەتىنىنە سەنىم ءبىلدىردى. ول حالىقارالىق جانە ايماقتىق قاۋىپسىزدىك پەن ورنىقتى دامۋداعى وزەكتى ماسەلەلەردى شەشۋدە استانانىڭ ۇلەسى زور دەپ سانايدى.