مەملەكەت باسشىسى قاسىم-جومارت توقايەۆ اۋعانستان حالقىن گۋمانيتارلىق داعدارىس قاتەرىمەن جەكەلەي قالدىرۋعا بولمايتىنىن ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«الەمدە بولىپ جاتقان وقيعالار تەرروريزم، ەكسترەميزم، ترانسۇلتتىق قىلمىس قازىرگى زاماننىڭ وزەكتى سىن-قاتەرى رەتىندە قالىپ وتىرعانىن كورسەتىپ تۇر. بۇل جاعدايدا ازياداعى ءوزارا ءىس-قيمىل جانە سەنىم شارالارى كەڭەسى (اوىسشك) قىزمەتى ەرەكشە وزەكتى بولادى. قازاقستان فورۋمنىڭ ءىس باسىنداعى ءتوراعاسى بولىپ وتىر جانە اوىسشك كەڭىستىگىندە قاۋىپسىزدىك پەن ىنتىماقتاستىقتى نىعايتۋ ءۇشىن بارشا كۇش-جىگەرىن سالادى. فورۋمنىڭ ينستيتۋسيونالدى ارى قاراي دامۋى، ونىڭ حالىقارالىق ۇيىمعا ترانسفورماسياسى بۇل جۇمىسقا جاڭا سەرپىن بەرەدى دەپ سانايمىز»، - دەدى قاسىم-جومارت توقايەۆ «ورتالىق ازيا – ءۇندىستان» سامميتىندە.
ق ر پرەزيدەنتى ازياداعى ءوزارا ءىس-قيمىل جانە سەنىم شارالارى كەڭەسىنىڭ الەۋەتى مەن مارتەبەسىن نىعايتۋدا ءۇندىستاننىڭ ءرولى اۋقىمدى ەكەنىن اتاپ ءوتتى.
«وسى جىلى اوىسشك-نىڭ مەرەيتويلىق ءسامميتى وتەدى. وسى ورايدا مودي مىرزانى (ءۇندىستان پرەمەر-مينيسترى نارەندرا مودي) قازاقستان استاناسىندا كورەتىنىمىزگە ۇمىتتەنەمىز. فورۋم اياسىندا تالقىلاۋعا شىعارىلاتىن وزەكتى ماسەلەلەردىڭ قاتارىندا اۋعانستان پروبلەماتيكاسى دا بولادى»، - دەدى مەملەكەت باسشىسى.
وسى ورايدا قاسىم-جومارت توقايەۆ اۋعانستان مەن ونىڭ حالقىن تەڭدەسسىز قيىندىقتارىمەن جانە گۋمانيتارلىق داعدارىس قاتەرىمەن جەكەلەي قالدىرۋعا بولمايتىنىن قاداپ ايتتى.
قازاقستان ءوز تاراپىنان ازىق-تۇلىك، قاجەتتى تاۋارلارمەن جانە دارى-دارمەك تۇرىندەگى كومەكتى باعىتتاي وتىرىپ، اۋعانستانمەن ءوزارا ءىس-قيمىلدى جالعاستىرىپ كەلەدى.