پرەزيدەنت الماتى قالاسىنا جۇمىس ساپارى اياسىندا 1970 جىلى ءوزى بىتىرگەن ءىلياس ەسەنبەرلين اتىنداعى №25 مەكتەپ-گيمنازياسىنا باردى دەپ حابارلايدى almaty-akshamy.kz
مەملەكەت باسشىسى زاماناۋي ينتەراكتيۆتى وقۋ قۇرالدارىمەن جابدىقتالعان كابينەتتەردى، اكت زالى مەن مەكتەپ كىتاپحاناسىن ارالاپ كوردى.
قاسىم-جومارت توقايەۆ كەزىندە ءوزى وقىعان سىنىپقا كىردى. قازىرگى ۋاقىتتا بۇل كابينەتتە فرانسۋز ءتىلى وقىتىلادى.
بۇدان بولەك مەملەكەت باسشىسى مەكتەپ تاريحىنا ارنالعان مۋزەيدىڭ ەكسپوزيسياسىمەن تانىستى. وندا وقۋ ورداسىنىڭ وتكەنى تۋرالى ءتۇرلى ارحيۆ قۇجاتتارى، بەلگىلى تۇلەكتەردىڭ ءومىرباياندارى مەن فوتوسۋرەتتەرى جيناقتالعان.
سودان كەيىن پرەزيدەنت مەكتەپ كىتاپحاناسىنداعى قۇرمەتتى قوناقتار كىتابىنا قولتاڭبا قالدىردى.
قاسىم-جومارت توقايەۆقا 1970 جىلى 10 «ۆ» سىنىبىنىڭ اتىنان ءوزى جازعان حات كورسەتىلدى. بۇل حات ۋاقىت كاپسۋلاسىنا سالىنىپ، مەكتەپ قابىرعاسىنا قالانعان ەكەن.
«ءبىزدىڭ اتقارعان ءىسىمىز از ەمەس، دەگەنمەن ءالى دە جۇمىس كوپ. ءبىز 10-سىنىپتى جاقسى بىتىرۋگە ۋادە بەرەمىز. ينستيتۋتقا ءتۇسۋ ەمتيحاندارىن جاقسى تاپسىرۋعا ۋادە بەرەمىز. ال ونى بىتىرگەن سوڭ جۇمىس ىستەيمىز. 2017 جىلى 64-65 جاسقا تولعان كەزىمىزدە سىزدەردىڭ كوزدەرىڭىزگە تىك قاراۋعا ۇيالمايتىنداي بولىپ كەلۋگە ۋادە بەرەمىز»، – دەپ جازىلعان حاتتا.
ءداستۇردى جالعاستىرعان 11-سىنىپ وقۋشىلارى مەملەكەت باسشىسىمەن بىرگە 2050 جىلعا ارنالعان حاتتى ۋاقىت كاپسۋلاسىنا سالىپ، مەكتەپ قابىرعاسىنا قويدى.
