الماتىدا ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە «ءداستۇر -حالىق رۋحى. دالا قازىناسى» اتتى كورمەسى اشىلدى، دەپ حابارلايدى اlmaty-akshamy.kz.
ەكسپوزيسيادا مۋزەي قورىنداعى قازاقستاننىڭ ءداستۇرلى جانە قازىرگى زاماننىڭ ساندىك-قولدانبالى ونەرىنىڭ 60-تان استام تۋىندىسى ۇسىنىلعان.
كورمەگە كەلۋشىلەر قازاقتىڭ حالىق قولونەرشىلەرى مەن ءار ۇرپاققا جاتاتىن ساندىك-قولدانبالى ونەردەگى كاسىبي سۋرەتشىلەردىڭ جۇمىستارىمەن تانىسا الادى. ولاردىڭ ىشىندە كيىز، توقىلعان جانە كەستەلەنگەن كىلەمدەر، گوبەلەندەر، ات-ابزەلدەرى، اعاش، تەرى، مەتالل شەبەرلەرىنىڭ تۋىندىلارى بار.
كورمەنىڭ تاعى ءبىر تۇتاس ءبولىمى قابىرعاعا كەستەلەنگەن تۇسكيىزدەرگە ارنالعان. كيىز ءۇيدىڭ ساندىك بەزەندىرىلۋىندە توردەن قۇرمەتتى ورىن الىپ، وتباسىلىق باقىت پەن اماندىقتى بەينەلەيدى. قازىرگى ساندىك-قولدانبالى ونەردىڭ ەڭ كەڭ تارالعان ءتۇرى گوبەلەندەرگە دە ارنالعان جەكە ەكسپوزيسيا بار.
اتالمىش كورمە قازىرگى زامانعى مادەنيەت تۇرعىسىنان حالىق ونەرىن ساقتاۋ مەن زەردەلەۋدىڭ ماڭىزىن كورسەتەدى. ءىس-شارا 2024 جىلدىڭ 30 تامىزىنا دەيىن جالعاسادى.