8،4 ميلليوننان استام ادام بانككە بورىشتار.
سوڭعى 1،5 جىلدا بۇل كورسەتكىش 27 پايىزعا ارتقان، دەپ حابارلايدى Almaty-akshamy.kz
ءماجىلىس ءتوراعاسى ەرلان قوشانوۆ حالىقتىڭ نەسيەگە تاۋەلدىلىگى مەن قارجىلىق ساۋاتىنىڭ تومەندىگى ۇلكەن الەۋمەتتىك ماسەلەگە اينالعانىن ايتتى.
"جاسىراتىنى جوق، ءقازىر بانكتەردەن شەكتەۋسىز كرەديت الىپ، قارىزعا بەلشەسىنەن باتىپ وتىرعان ازاماتتارىمىز كوپ. "حالىق نەسيە قامىتىن كيىپ وتىر" دەسە دە بولادى. قازىرگى ۋاقىتتا حالىقتىڭ 84 پايىزىندا، ياعني 8،4 ميلليوننان استام ادامنىڭ قارىزى بار ەكەن. سوڭعى ءبىر جارىم جىل ىشىندە بۇل كورسەتكىش 27 پايىزعا وسكەن. 90 كۇننەن كەشىكتىرىلگەن قارىز كولەمى –شامامەن 1،4 ترلن تەڭگە. ياعني، 1،7 ميلليون ادام قارىزىن ۋاقىتىلى تولەي الماي وتىر دەگەن ءسوز"، - دەدى ول.
ونىڭ سوزىنشە، وسىنىڭ ءبارى نەسيە پروبلەماسىنىڭ قانشالىقتى اسقىنىپ كەتكەنىن كورسەتىپ وتىر.
"بۇل جاعدايدىڭ سەبەبى نەدە؟ مۇندا قارجى ۇيىمدارى دا بەلگىلى ءبىر ءرول اتقارادى. وعان قارجى ينستيتۋتتارىنىڭ جارناماسى، نەسيە الۋ پروسەدۋراسىنىڭ وڭاي مەن قولجەتىمدى بولۋى دا كىرەدى. بۇگىندە 14-16 جاستاعى جاسوسپىرىمدەر دە ونلاين نەسيە الا الادى. وعان تەك سمارتفون مەن ينتەرنەت قاجەت"، - دەپ اتاپ ءوتتى ءماجىلىس سپيكەرى.
ەرلان قوشانوۆ ءبىر ادامدا ەكى نەمەسە ودان دا كوپ نەسيەنىڭ بولۋى قالىپتى جاعدايعا اينالعانىن باسا ايتتى. كەيدە ميكروقارجى ۇيىمدارىندا ءبىر ادامدا 20-عا دەيىن قارىزى بولاتىن جاعدايلار دا بار، دەپ جالعاستىردى ول.
"تاجىريبە كورسەتكەندەي، ادامدار بانك كەلىسىمشارتتارىنىڭ تالاپتارىن زەرتتەمەي جاتادى. ولار نەسيەلەردى ارتىق تولەم سوماسىن تۇسىنبەي، رەسىمدەپ جاتادى. بۇل اسىعىس ارەكەتتەردىڭ سالدارى كەيىننەن اجىراسۋعا، الكوگوليزمگە، سۋيسيدكە، لۋدومانياعا اكەپ سوقتىرادى. ادامدار قارجىلىق تۇساۋدان قۇتىلۋدى كوزدەپ، تەز اقشا الامىن دەپ قارجى پيراميدالارى مەن الاياقتىقتىڭ باسقا تۇرلەرىنىڭ قۇربانى بولىپ جاتادى"، - دەدى ءماجىلىس ءتوراعاسى.
ول جاعدايدى تۇبەگەيلى شەشۋ ءۇشىن ءالى دە كەشەندى شارالار قاجەت ەكەنىن، ەڭ اۋەلى حالىقتىڭ قارجىلىق ساۋاتىن ارتتىرۋ قاجەتتىگىن اتاپ ءوتتى. ەرلان قوشانوۆتىڭ سوزىنشە، قارجىلىق ساۋاتتىلىق كۋرسىن مەكتەپ پەن جوعارى وقۋ ورىندارىنىڭ ءبىلىم بەرۋ باعدارلامالارىنا ەنگىزۋ كەرەك.
"جاستار اقشانى ورنىمەن جۇمساۋ، بيۋدجەتتى جوسپارلاۋ، ينۆەستيسيا سالۋ سياقتى بازالىق ۇعىمداردى مەڭگەرگەنى ءجون. ەكىنشىدەن، ەڭ الدىمەن ماسەلەنىڭ سالدارىمەن ەمەس، سەبەپتەرىمەن كۇرەسۋ كەرەك. مۇنى زاڭدار ارقىلى عانا ىسكە اسىرۋعا بولادى. نەسيە بەرۋگە قويىلاتىن تالاپتاردى زاڭنامالىق دەڭگەيدە قاتاڭداتۋ قاجەت. تولەم قابىلەتى جوق ازاماتتارعا نەسيە بەرۋگە تىيىم سالۋ كەرەك. ونلاين-نەسيەلەۋدى قاتاڭداتۋ قاجەت"، - دەدى ءماجىلىس ءتوراعاسى.