قازاقستان ءوز دامۋىندا كەشەندى رەفورمالار ارقىلى ساياسي، ەكونوميكالىق جانە الەۋمەتتىك سالالارىن جان-جاقتى جەتىلدىرۋدىڭ اۋقىمدى پروسەسىن جۇزەگە اسىرۋدا.
ەلىمىزدىڭ پرەزيدەنتى قاسىم-جومارت توقايەۆ بىرنەشە جىلدىڭ بارىسىندا اۋقىمدى وزگەرىستەردى ىسكە اسىرىپ كەلەدى. ولاردىڭ بارلىعى قوعامدا جيناقتالعان تۇيتكىلدى پروبلەمالاردى، ازاماتتاردىڭ كوتەرىپ ءجۇرگەن وزەكتى ماسەلەلەرىن شەشۋگە، حالىقتىڭ مۇددەسىن قورعاۋدى نىعايتۋعا، ادىلەتتىلىك پرينسيپتەرىنىڭ مىزعىماستىعىن قامتاماسىز ەتۋگە جانە وتانداستارىمىزدىڭ ءومىر ساپاسىن جاقسارتۋعا باعىتتالعان. بۇل پروسەستەر مەملەكەت باسشىسى ءوزى باستاما كوتەرىپ ۇسىنعان «حالىق ۇنىنە قۇلاق اساتىن مەملەكەت» ءپرينسيپىنىڭ جان-جاقتى ورىندالىپ كەلە جاتقاندىعىنىڭ ايقىن كورىنىسى دەپ ءبىلەمىن.
حالىققا ارنالعان قىركۇيەك ايىنداعى جولداۋدا ەلىمىزدىڭ مودەرنيزاسياسى ءوزىنىڭ جالعاسىن تاپتى. پرەزيدەنتتىك مەرزىمدى ەكى مەرزىمنەن ءبىر مەرزىمگە قىسقارتىپ، جەتى جىلدىق كولەمدە بەكىتۋ ۇسىنىلدى. بۇل مەملەكەتىمىزدەگى ساياسي ءارالۋاندىقتىڭ نىعايۋى مەن دەموكراتيا پرينسيپتەرىنىڭ كەڭەيۋى دەپ ەسەپتەيمىن.
وسىمەن بىرگە قازاقستان تاريحىندا العاش رەت سايلاۋدىڭ الدىن الا جاريالانۋ فاكتىسىنىڭ كۋاگەرى بولدىق. پرەزيدەنت ءبىر اي بۇرىن سايلاۋ پروسەستەرىنىڭ باستالۋىن جاريا ەتتى. اتالمىش ۇسىنىستىڭ ەلدەگى ساياسي ۇيىمداردىڭ جۇمىسىن جوسپارلى ۇيىمداستىرۋعا نەگىز بولاتىنىن وتاندىق ساراپشىلارمەن قاتار، شەتەلدىك ساياساتكەرلەر مەن كاسىبي ماماندار دا اتاپ ءوتتى.
ءقازىر الەمدەگى گەوساياسي احۋال اسا كۇردەلى، ءبىزدىڭ وڭىرىمىزدەگى جاعداي دا الاڭداۋشىلىق تۋدىرادى. وسى ماقساتتا قازاقستان ىشىندەگى تۇراقتىلىقتى نىعايتۋ ستراتەگيالىق ماڭىزعا يە.
ەلىمىزدەگى ساياسي جۇيە تولىعىمەن جاڭعىرۋى قاجەت. وسى ماقساتتا كەزەكتەن تىس پرەزيدەنت سايلاۋى 20 قاراشاعا بەلگىلەنىپ، ءماجىلىس پەن بارلىق دەڭگەيدەگى ءماسليحاتتار سايلاۋلارى كەلەسى جىلدىڭ ءبىرىنشى جارتىجىلدىعىنا جوسپارلانۋدا.
قازاقستان قوعامى ىشكى پروسەستەرىن بەرىكتەندىرىپ، الداعى دامۋدىڭ نىق العىشارتتارىن قالىپتاستىرۋدا.