الماتىدا پوليسەيلەر مەن ۇلتتىق ۇلاندىقتار ۇوس كەزىندە قازا بولعان باتىرلاردى ەسكە الدى.
الماتىداعى 28 گۆاردياشىل-پانفيلوۆشىلار اتىنداعى ساياباقتا داڭق جانە ماڭگىلىك الاۋ مونۋمەنتىنىڭ جانىندا سالتاناتتى ميتينگ ءوتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
قۇقىق قورعاۋ ورگاندارىنىڭ قىزمەتكەرلەرى، ۇلتتىق ۇلاننىڭ اسكەري قىزمەتشىلەرى، ءىىو ارداگەرلەرى مەن اسكەري-پاتريوتتىق كلۋبتاردىڭ وقۋشىلارى ۇلى وتان سوعىسىنىڭ باتىرلارىن ءبىر مينۋت ۇنسىزدىكپەن ەسكە الىپ، مەموريالدىق كەشەنگە گۇل شوقتارىن قويۋ ءراسىمىن وتكىزدى.
اقپاراتتىق-ناسيحاتتىق توبىنىڭ جەتەكشىسى، ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى قايرات ۇمبەتوۆ پەن الماتى قالاسى پوليسيا دەپارتامەنتى باستىعىنىڭ ورىنباسارى ولجاس مىرزابەكوۆ قان مايداندا فاشيستەردىڭ باسىمدىعىنا ەرلىكپەن توتەپ بەرگەن جاۋىنگەرلەر قۇرمەتىنە ورناتىلعان ەسكەرتكىشتىڭ باتىرلاردىڭ ەرلىكتەرىن قاستەرلەۋ ورنى ەكەنىن اتاپ ءوتتى.
«الماتىعا كەلگەن اقپاراتتىق-ناسيحاتتىق توبى جەكە قۇرامنىڭ جاۋىنگەرلىك رۋحىن كوتەرۋگە باعىتتالعان ءىس-شارالار كەشەنىن وتكىزۋدە. ىشكى ىستەر ءمينيسترى مەن ۇلتتىق ۇلان باس قولباسشىسىنىڭ باستاماسى بويىنشا ءوتىپ جاتقان ءىس-شارالاردىڭ قۇقىق قورعاۋ ورگاندارىنىڭ قىزمەتكەرلەرى مەن اسكەري قىزمەتشىلەر ءۇشىن ماڭىزى زور. وسى جۇمىس اياسىندا ءبىز بۇگىن ۇلى وتان سوعىسى كەزىندە ەرلىكپەن قازا تاپقان باتىرلاردى ەسكە الىپ جاتىرمىز. ەلىمىزدىڭ قورعاۋىندا تۇرعان جاۋىنگەرلەردىڭ كاسىبيلىگى تەك بەيبىت ۋاقىتتا عانا سىنالۋىن تىلەيمىن»، – دەدى حالىق قاھارمانى قايرات جارىلقاسىن ۇلى.
ءىس-شاراعا ىشكى ىستەر ورگاندارىنىڭ ارداگەرلەرى، ۇلتتىق ۇلاننىڭ “وڭتۇستىك” وڭىرلىك قولباسشىلىعى اسكەري بولىمدەرىنىڭ قولباسشىلىقتارى مەن جەكە قۇرامى، سونداي-اق الماتى گارنيزونىنىڭ پوليسيا قىزمەتكەرلەرى قاتىستى.