ورتالىقتى بىتىرگەن تۇلەكتەر ۇدايى جوعارى ناتيجەلەر كورسەتىپ كەلەدى.
قاراساي باتىر اتىنداعى قۇرلىق اسكەرلەرىنىڭ وقۋ-جاتتىعۋ ورتالىعىن اسكەري ماماندىقتار بويىنشا ءبىلىم العان 1000-نان استام مەرزىمدى قىزمەتتەگى اسكەري قىزمەتشى ءبىتىرىپ شىقتى، دەپ حابارلايدى Almaty-akshamy.kz.
«مەملەكەت باسشىسىنىڭ ارميانىڭ جاۋىنگەرلىك قابىلەتىن تۇبەگەيلى ارتتىرۋ جونىندەگى تاپسىرماسىن ىسكە اسىرۋ شەڭبەرىندە اسكەرلەر قازىرگى زامانعى باعدارلاما بويىنشا وقىتىلعان اسكەري قىزمەتشىلەرمەن تولىقتىرىلادى»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
قارۋلى كۇشتەر قاتارىنا كەلگەن ساربازدار جارتى جىل ىشىندە موتواتقىشتار، تانك، دەسانتتىق-شابۋىلداۋ اسكەرلەرىنە، ارتيللەرياعا، تەڭىز جاياۋ اسكەرلەرى مەن اۋە شابۋىلىنا قارسى قورعانىس بولىمشەلەرىنە ارنالعان ۇرىس ماشينالارىنىڭ مەحانيك-جۇرگىزۋشىلەرى جانە كوزدەۋشى-وپەراتورلارى ماماندىقتارىن مەڭگەرەدى.
«قۇرلىق اسكەرلەرى وقۋ-جاتتىعۋ ورتالىعىنىڭ وقۋ-ماتەريالدىق بازاسى كىشى مامانداردى جوعارى دەڭگەيدە وقىتۋدى ۇيىمداستىرۋعا مۇمكىندىك بەرەدى. مۇندا ۇدەتكىش-جاتتىقتىرۋ قۇرالدارى، وقۋ-جاتتىعۋ پوليگوندارى، ارنايى وقۋلىقتارمەن جابدىقتالعان اۋقىمدى كىتاپحانا بار. تاجىريبەلى وقىتۋشىلاردىڭ ەڭبەگىنىڭ ارقاسىندا ورتالىقتى بىتىرگەن تۇلەكتەرىمىز جاۋىنگەرلىك دايارلىقتا ۇدايى جوعارى ناتيجەلەر كورسەتىپ كەلەدى»، – دەپ اتاپ ءوتتى وقۋ-جاتتىعۋ ورتالىعىنىڭ كومانديرى، پولكوۆنيك الماس دوسپايەۆ.
وقۋدى بىتىرگەن جاۋىنگەرلەردى قىزمەتىن جالعاستىرۋ ءۇشىن قۇرلىق اسكەرلەرىنىڭ اسكەري بولىمدەرىنە جىبەرىلەدى.