2023 وقۋ جىلىنىڭ جاۋىنگەرلىك دايىندىق جوسپارىنا سايكەس ەلىمىزدىڭ قۇرلىق اسكەرلەرى مەن دەسانتتىق-شابۋىلداۋ اسكەرلەرى بولىمشەلەرى اراسىندا «مەرگەندەر باتالونى» جارىسى ءوتتى.
قارۋلى كۇشتەردىڭ پوليگوندارى مەن وقۋ ورتالىقتارىندا مەرزىمدى قىزمەتتەگى اسكەري قىزمەتشىلەردى قوسا العاندا، بولىمشەلەردىڭ جەكە قۇرامى شتاتتىق قارۋ-جاراق پەن اتىس قارۋىنان باقىلاۋ جانە وقۋ اتۋ جاتتىعۋلارىن، سونداي-اق اتىس دايارلىعى مەن اسكەري توپوگرافيا نورماتيۆتەرىن ورىندادى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
جەڭىمپازدار ەكى نوميناسيا بويىنشا انىقتالدى. ونىڭ ءبىرىنشىسى مەحانيكالاندىرىلعان، تانك، دەسانتتىق-شابۋىلداۋ، شابۋىلداۋ، تەڭىز جاياۋ اسكەرى قۇرامالارىنىڭ موتواتقىشتار، دەسانتتىق-شابۋىلداۋ مەحانيكالاندىرىلعان، تانك، جانە شابۋىلداۋ باتالوندارىنىڭ، ەكىنشىسى مەحانيكالاندىرىلعان، تانك، شابۋىلداۋ جانە تەڭىز جاياۋ اسكەرى قۇرامالارىنىڭ تانك باتالوندارىنىڭ اراسىندا ءوتتى.
جارىس قورىتىندىسى بويىنشا موتواتقىشتار (دەسانتتىق-شابۋىلداۋ) باتالوندارى اراسىندا ءبىرىنشى ورىندى وسكەمەن گارنيزونىنىڭ 2 موتواتقىشتار باتالونى، ەكىنشى ورىندى قاراعاندى گارنيزونىنىڭ 1 موتواتقىشتار باتالونى، ءۇشىنشى ورىندى قونايەۆ گارنيزونىنىڭ 2 دەسانتتىق-شابۋىلداۋ باتالونى يەلەندى.
تانك باتالوندارى اراسىندا ءبىرىنشى ورىندى اقتاۋ گارنيزونىنىڭ تەڭىز جاياۋ اسكەرلەرى بريگاداسىنىڭ تانك باتالونى، ەكىنشى ورىندى اياگوز گارنيزونىنىڭ 1 تانك باتالونى، ءۇشىنشى ورىندى شىمكەنت گارنيزونىنىڭ تانك باتالونى يەلەندى.
قۇرامىندا اسكەري باسقارۋ ورگاندارىنىڭ، قۇرلىق اسكەرلەرى مەن اسكەري-وقۋ ورىندارىنىڭ تاجىريبەلى وفيسەرلەرى بولعان تورەشىلەر القاسى بولىمشە كومانديرلەرىنىڭ كەشەندى اتىس مىندەتتەرىن شەشۋ داعدىلارىن يگەرۋ دەڭگەيىن جانە اسكەري قىزمەتشىلەردىڭ دالالىق داعدىلارىن باعالادى.