ءاربىر ەلدىڭ قاسيەت تۇتاتىن ەرەكشە ۇعىمدارى بولادى. ءبىزدىڭ حالىق ءۇشىن وسىنداي قاسيەتتەردىڭ ءبىرى – قارتتاردى قۇرمەتتەۋ. ولار – ەلدىڭ التىن دىڭگەگى.
«ق ر ۇلتتىق ۇلاننىڭ وڭىرلىك قولباسشىلىعى ارداگەرلەر كەڭەسىنىڭ باستاماسىمەن قۇرىلعان ارنايى توپ قارتتار ايلىعى اياسىندا قارت جاۋىنگەرلەردىڭ ءارقايسىسىنىڭ شاڭىراعىنا بارىپ، امانداسىپ، قال-جاعدايلارىن ءبىلىپ، سىي-سياپاتتارىن ۇسىنىپ، قولباسشىلىقتىڭ العىس حاتىن تاپسىردى. ولاردىڭ قاتارىندا 101 جاسقا كەلىپ وتىرعان، ايگىلى پانفيلوۆ ديۆيزياسىنىڭ قارت جاۋىنگەرى قايىرلى جوڭقابايەۆ، وتستاۆكاداعى پولكوۆنيكتەر عالىمجان باكيشيەۆ، ماگومەد مايندۋروۆ، ۆاسيليي مەزين جانە تاعى باسقالار بار. سونىمەن قاتار، قاريالارعا ماتەريالدىق كومەك بەرۋگە اسكەر ارداگەرى ماليك توحتاحۋنوۆ دەمەۋشىلىك جاساپ، ۇلكەن كومەك بەردى»، – دەيدى پودپولكوۆنيك باقىت الىپبايەۆ.
«وڭتۇستىك وڭىردە اسكەري سالادا ەڭبەك ەتكەن قارت ارداگەرلەرىمىز بارشىلىق. الماتىنىڭ وزىندە 30-عا تارتا قاريامىز بار. ابىز اقساقالدار ءبىز ءۇشىن ناعىز ەڭبەكقور تۇلعانىڭ ۇلگىسى بولسا، جاستارىمىز ءۇشىن تاربيەنىڭ قاينار بۇلاعى. سوندىقتان الدىڭعى بۋىن اتالارىمىزدىڭ دەنى ساۋ، عۇمىرى ۇزاق بولسىن، اقساقالدارىمىزدىڭ وتىرعان ورنى جاستار جۇگىنەتىن، ولارعا جول سىلتەيتىن اق وردا بولسىن»، – دەيدى ارداگەرلەر كەڭەسىنىڭ ءتوراعاسى، زاپاستاعى پولكوۆنيك اساتوللا قۇلاحمەتوۆ.
ەل تىنىشتىعىن تىلەپ، باتاسىن بەرگەن ارداگەرلەر وزدەرىنە كورسەتىلگەن قۇرمەتكە ريزاشىلىقتارىن ءبىلدىردى.