بۇل شەشىم باعا تۇراقتىلىعىن قولداۋ قاجەتتىگىنە نەگىزدەلگەن.
قازاقستاننىڭ ۇلتتىق بانكى گەوساياسي جاعدايدىڭ ايتارلىقتاي ناشارلاۋى كەزىندە سىرتقى سەكتور تاراپىنان تاۋەكەلدەردىڭ ىسكە اسىرىلۋىنا بايلانىستى قاراستىرىلعان باعا تۇراقتىلىعىن قولداۋ قاجەتتىگىنە نەگىزدەلگەن بازالىق مولشەرلەمە دەڭگەيى جونىندە كەزەكتەن تىس شەشىم قابىلدادى، دەپ حابارلايدى Almaty-akshamy.kz.
«2022 جىلعى 24 اقپاننان باستاپ بازالىق مولشەرلەمە +/- 1 پ.ت. پايىزدىق دالىزىمەن جىلدىق 13،5% دەڭگەيىندە بەلگىلەندى. تيىسىنشە، وتىمدىلىكتى ۇسىنۋ جونىندەگى تۇراقتى قولجەتىمدى وپەراسيالار بويىنشا مولشەرلەمە 14،5% جانە وتىمدىلىكتى الۋ جونىندەگى تۇراقتى قولجەتىمدى وپەراسيالار بويىنشا مولشەرلەمە 12،5%بولادى»، - دەلىنگەن ۇلتتىق بانك باسپا ءسوز قىزمەتىنىڭ حابارلاماسىندا.
قازاقستان رەسپۋبليكاسى ۇلتتىق بانكىنىڭ ينفلياسيالىق تارگەتتەۋ شەڭبەرىندە جۇرگىزىلەتىن اقشا-كرەديت ساياساتى ەل ەكونوميكاسىنا سىرتقى كۇتپەگەن وزگەرىستەر سالدارىنىڭ تارالۋىنىڭ الدىن الۋعا، ماكروەكونوميكالىق تۇراقتىلىقتى قامتاماسىز ەتۋگە جانە تەڭگەدەگى اكتيۆتەردى قورعاۋعا باعىتتالعان. ەكىنشى دەڭگەيدەگى بانكتەر اقشا-كرەديت ساياساتى قۇرالدارىنىڭ شەڭبەرىندە قاجەتتى وتىمدىلىكپەن قامتاماسىز ەتىلۋدە.
قازاقستان رەسپۋبليكاسىنىڭ ۇلتتىق بانكى قارجى جۇيەسىنىڭ تۇراقتىلىعىن قامتاماسىز ەتۋ ءۇشىن شامادان تىس قۇبىلمالىلىق ورىن العان كەزدە ۆاليۋتالىق ينتەرۆەنسيالار جۇرگىزۋ قۇقىعىن ساقتاي وتىرىپ، تەڭگەنىڭ ەركىن وزگەرمەلى ايىرباستاۋ باعامى رەجيمىن ۇستانۋىن جالعاستىرادى. ماڭىزدىلىعى سىرتقى سەكتور تاراپىنان تاۋەكەلدەردى ىسكە اسىرۋ اياسىندا وسكەن تەڭگەنىڭ يكەمدى باعامى التىن-ۆاليۋتا اكتيۆتەرىنىڭ ساقتالۋىن قامتاماسىز ەتۋگە مۇمكىندىك بەرەدى.
قازاقستان رەسپۋبليكاسىنىڭ ۇلتتىق بانكى 2022 جىلعى 24 اقپاندا ساعات 13:00-دەگى جاعداي بويىنشا 104 ملن اقش دوللارى سوماسىنا ۆاليۋتالىق ينتەرۆەنسيا جۇرگىزدى. وسى اپتادا ۆاليۋتالىق ينتەرۆەنسيا 137 ملن اقش دوللارىن قۇرادى.
قازاقستان رەسپۋبليكاسىنىڭ ۇكىمەتى قازاقستان رەسپۋبليكاسىنىڭ ۇلتتىق بانكىمەن بىرلەسىپ ىسكە اسىراتىن حالىقتىڭ تەڭگەدەگى دەپوزيتتەرىن قولداۋ جونىندەگى شارالار تۋرالى قوسىمشا حابارلاناتىن بولادى.
ۇلتتىق بانك ىشكى اقشا جانە ۆاليۋتا نارىقتارىنداعى جاعدايعا، سونداي-اق الەمدىك شيكىزات نارىقتارىنداعى احۋالعا ۇزدىكسىز مونيتورينگ جۇرگىزەدى جانە قاجەت بولعان كەزدە قارجىلىق تۇراقتىلىقتى قامتاماسىز ەتۋ بويىنشا قوسىمشا شارالار قابىلدايدى.
قازاقستان رەسپۋبليكاسى ۇلتتىق بانكىنىڭ بازالىق مولشەرلەمە جونىندەگى كەزەكتى شەشىمى 2022 جىلعى 9 ناۋرىزدا نۇر-سۇلتان قالاسىنىڭ ۋاقىتى بويىنشا 15:00-دە جاريالاناتىن بولادى.