قازىرگى ۋاقىتتا قارجى پيراميدالارىن باستاپقى كەزەڭدە جويۋ شارالارى قولدانۋدا.
الماتىنىڭ وكىلەتتى قىزمەتتەرى ادامداردى الاياقتىق جولمەن اربايتىن 376 ينتەرنەت سىلتەمە بۇعاتتالدى. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى بويىنشا ەكونوميكالىق تەرگەۋ دەپارتامەنتىنىڭ وكىلدەرى ايتتى، دەپ حابارلايدى Almaty-akshamy.kz
مەملەكەتتىك ورگاننىڭ مالىمەتىنشە، جىل باسىنان بەرى 9 قارجى پيراميداسىنىڭ (WBIC، Robotex، Hit Beat Music، Qnet، Chia Thai، Bincloud، S-Group، Marqar، Patin Coin) جولى كەسىلدى – 3000 ادام ولاردىڭ قۇربانى بولعان.
سونداي-اق، جىل باسىنان بەرى ينتەرنەت-رەسۋرستاردى تەكسەرەتىن «بايقا پيراميدا» Telegram-بوتى ىسكە قوسىلدى.
“ەندى ءبىزدىڭ ازاماتتار سايتتار مەن الەۋمەتتىك جەلىلەردىڭ فينپيراميدا بەلگىلەرىنىڭ بار-جوعىن ءوز بەتىنشە تەكسەرە الادى. بۇل ولاردىڭ «الاياقتىق» سحەمالارعا الدانۋىنا جول بەرمەيدى. ازىرلەنگەن ءونىم حالىق اراسىندا ۇلكەن سۇرانىسقا يە ەكەندىگى ءقازىردىڭ وزىندە بايقالادى. قىسقا ۋاقىت ىشىندە ازاماتتاردان تۇسكەن 6 مىڭنان استام ءوتىنىم قارالدى، ولارعا بوت اۆتوماتتى تۇردە جاۋاپ بەردى”، - دەدى ەكونوميكالىق تەرگەۋ دەپارتامەنتىنىڭ اسا ماڭىزدى ىستەر جونىندەگى جەدەل ۋاكىلى جاقسىلىق مىرزاحان.
كەلەسى قارجى پيراميدالارىن ۇيىمداستىرۋشىلار جاۋاپقا تارتىلدى جانە ۇزاق مەرزىمگە سوتتالدى: «Innova Gold»، «IG Group KZ»، «Qozgan، Tender»، «Rich Beach»، «الفا سەيلس كونسالتينگ»، «ESS Group» جانە «Qnet». «Energy Eolus Qazaqstan» قارجى پيراميداسىن ۇيىمداستىرۋشىلارعا قاتىستى سوتقا دەيىنگى تەرگەۋ جۇرگىزىلۋدە.
“ۇيىمداستىرۋشىلار سەنىمدى ازاماتتارعا جاڭارتىلاتىن ەنەرگيا كوزدەرىن جانە ەنەرگيانى ساقتاۋ وبەكتىلەرىن جوسپارلاۋ، سالۋ جانە پايدالانۋ جوبالارىنا اقشالاي قاراجاتتارىن سالۋدى ۇسىندى، بۇل تاۋلىگىنە 2،7% - دان 3،4% - عا دەيىن، ياعني ايىنا 80% - دان استام جانە جىلىنا 950% - دان استام تابىس تۇسەدى دەپ ۋادە بەردى. سالىم سوماسى 30 دوللاردان 2700 دوللارعا دەيىن. جەدەل-ىزدەستىرۋ ءىس-شارالارىن وتكىزۋ بارىسىندا 11 قالادا، اتاپ ايتقاندا اقتوبە، استانا، كوكشەتاۋ، وسكەمەن، اتىراۋ، ورال، قىزىلوردا، پاۆلودار، شىمكەنت، كەنتاۋ، سەمەي قالالارىندا كەڭسەلەر ورناتىلدى، سونداي - اق ۇيىمداستىرۋشىلاردىڭ شەتەلدە ەكەندىگى انىقتالدى”، - دەپ جالعاستىردى سپيكەر.
جەكە تۇلعالارعا كەلتىرىلگەن زالال سوماسى 259 ملن تەڭگەدەن اسادى.
مەملەكەتتىك ورگان وكىلدەرى اتاپ وتكەندەي، قارجى پيراميداسىنا كىرۋ ەرىكتى نەگىزدە جانە ەشقانداي قۇقىققا سۇيەنبەي جۇزەگە اسىرىلادى جانە ەشكىم سالىنعان قاراجاتتى قايتارۋعا كەپىلدىك بەرمەيدى. الايدا، اياقتالعان قىلمىستىق ىستەر بار، وندا ازاماتتار سالىنعان اقشانى قايتارىپ العان كەزدەر دە بولعان.
وسىلايشا، قابىلدانعان شارالاردىڭ ناتيجەسىندە ەتد قىزمەتكەرلەرى بانك شوتتارىنا، ۇيىمداستىرۋشىلاردىڭ جىلجىمالى جانە جىلجىمايتىن مۇلىكتەرىنە تىيىم سالدى. مىسالى، «World Business Consulting» قارجى پيراميداسىن ۇيىمداستىرۋشىلارعا قاتىستى قىلمىستىق ءىس بويىنشا سەگىز جابىرلەنۋشىگە 126 ملن تەڭگە سوماسىنا زالال وتەلدى.
«B2B Jewerly» قارجى پيراميداسىن ۇيىمداستىرۋشىلارعا قاتىستى قىلمىستىق ءىس بويىنشا 1200-دەن استام جابىرلەنۋشىگە 700،1 ملن تەڭگە سوماسىنا زالال وتەلدى. 2،2 ملرد تەڭگە سوماسىنا مۇلىككە تىيىم سالىندى.
“وسى مۇمكىندىكتى پايدالانا وتىرىپ، ازاماتتاردى ەلىمىزدە قارقىن الىپ جاتقان ينتەرنەت-الاياقتىقتان دا ساقتاندىرعىم كەلەدى. «جالعان قارجى» ۇيىمدارىنىڭ ۇسىنىستارىن تاراتۋ جاعدايلارى جيىلەپ كەتتى. ولار اقشانى مۇناي ءوندىرۋشى كومپانيالاردىڭ، بەلگىلى بانكتەردىڭ جانە كۆازيمەملەكەتتىك سەكتور سۋبەكتىلەرىنىڭ ءىرى جوبالارىنا جوعارى جانە ءپاسسيۆتى كىرىس تۇسەدى دەگەن ۋادەمەن ينۆەستيسيالاۋعا شاقىرادى”، - دەدى سپيكەر.
سونداي-اق، ول ۇيىمداستىرۋشىلار ادامداردى وزدەرىنە سەندىرۋ ءۇشىن تانىمال جاڭالىقتار پورتالدارىنىڭ لوگوتيپتەرى مەن ديزاينىن قولداناتىنىن، سونداي-اق بەلگىلى تۇلعالار مەن جوعارى لاۋازىمدى شەنەۋنىكتەردىڭ ەسىمدەرىن اتايتىنىن اتاپ ءوتتى.
“مۇنداي رەسۋرستارعا كىرە وتىرىپ، ءسىز ءوزىڭىزدىڭ ساۋالنامالىق دەرەكتەرىڭىزدى تولتىرماۋىڭىز كەرەك. وسىدان كەيىن ولار قوڭىراۋ شالا باستايدى، الدانعان ادامنىڭ ءاتى-جونىن اتاپ، وزدەرىن بانكتىڭ نەمەسە قۇقىق قورعاۋ ورگانىنىڭ قىزمەتكەرى رەتىندە تانىستىرادى جانە سىزگە نەسيە راسىمدەلگەنىن نەمەسە قىلمىستىق ءىس قوزعالدى دەپ الدايدى. ادامنىڭ توسىلىپ قالعان شاراسىز كۇيىن پايدالانىپ، ولار ءسىزدىڭ بانكتىك دەرەكتەرىڭىزدى ءبىلىپ الادى. وسىعان بايلانىستى، الماتى قالاسى بويىنشا ەكونوميكالىق تەرگەۋ دەپارتامەنتى ازاماتتاردى قىراعى بولۋعا جانە ءوز جيناقتارىن كۇماندى قارجى ۇيىمدارىنا سالماۋعا شاقىرادى”، - دەدى ول.
ەگەر ءسىز نەمەسە ءسىزدىڭ جاقىندارىڭىز قارجى پيراميدالارىمەن بەتپە-بەت كەلگەن جاعدايدا، جىبەك جولى داڭعىلى، 127 مەكەنجايى بويىنشا الماتى قالاسىنىڭ ەكونوميكالىق تەرگەۋ دەپارتامەنتىنە حابارلاسىڭىز نەمەسە 1458 كولل-ورتالىعىنىڭ نومىرىنە قوڭىراۋ شالىڭىز.