بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى، دەپ حابارلايدى اlmaty-akshamy.kz.
زاڭ جوباسىندا اسكەري قىزمەتتىڭ جاڭا ءتۇرىن - رەزەرۆتەگى قىزمەتتى ەنگىزۋ ۇسىنىلادى. زاڭ جوباسىنا سايكەس رەزەرۆتەگى قىزمەت - بۇل اۋماقتىق قاعيداتى بويىنشا (تۇرعىلىقتى جەرى بويىنشا) اسكەري قىزمەتتىڭ ەرىكتى ءتۇرى.
«رەزەرۆتەگى قىزمەت تۋرالى زاڭ جوباسىن ازىرلەۋگە جۇمىلدىرۋ جۇيەسىن ودان ءارى جەتىلدىرۋ نەگىز بولدى. بۇل نورمالار اسكەري ءبولىمدى ادامي رەسۋرسپەن كەپىلدى قامتاماسىز ەتۋگە رەزەرۆتە بولاتىن جاۋىنگەرلىك دايىن كۇشتى قۇرۋعا مۇمكىندىك بەرەدى. زاڭ جوباسىن ىسكە اسىرۋ ءۇشىن ەكى كودكسكە، ءتورت زاڭعا وزگەرىس ەنگىزىلەدى»، - دەدى قورعانىس ءمينيسترى رۋسلان جاقسىلىقوۆ.
ونىڭ ايتۋىنشا، قىلمىستىق كودەكسكە رەزەرۆتەگى جاۋىنگەردى اسكەري قۇقىق بۇزۋ سۋبەكتىسىنە جاتقىزۋ بويىنشا وزگەرىس ەنگىزىلەدى. ەڭبەك كودەكسىنە جۇمىس بەرۋشى مەن رەزەرۆتەگى اسكەري اراسىنداعى ەڭبەك قاتىناسىن رەتتەۋ بويىنشا تۇزەتۋ جاسالادى. ال «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا رەزەرۆتەگى اسكەري ادام مارتەبەسىن، ونىڭ قۇقىعى مەن مىندەتىن بەلگىلەۋ، رەزەرۆتەگى اسكەريدىڭ مىندەتىن ورىنداۋ كەزەڭىن ايقىنداۋ، رەزەرۆتە قىزمەت وتكەرۋ بويىنشا وزگەرىس ەنگىزىلەدى.
سونىمەن قاتار، «سىبايلاس جەمقورلىققا قارسى ءىس-قيمىل تۋرالى»، «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭدارىنا مەملەكەتتىك قىزمەتشىنىڭ رەزەرۆتە قىزمەت ەتۋ مۇمكىندىگى بويىنشا وزگەرىس جاسالادى.
«زاڭ جوباسىن ىسكە اسىرۋ ازاماتتارعا رەزەرۆتە اسكەري قىزمەت ەتۋگە مۇمكىندىك بەرەدى. ول ءۇشىن كەلىسىمشارت ەرىكتى تۇردە ءۇش جىلعا جاسالادى. دايارلىق ءبىر جىلدا ەكى ايدان اسپايدى. جاۋىنگەرلىك جيىندار 30 كۇندە ىسكە اسىرىلادى. رەزەرۆتەگىلەرگە ارنالعان ساباقتار اي سايىن ەكى-ۇش كۇن بولادى»، - دەدى مينيستر.
ونىڭ سوزىنە قاراعاندا، بۇل ءىس-شارالارعا قاراجات رەسپۋبليكالىق بيۋدجەت ەسەبىنەن قاراستىرىلادى. بىرىنشىدەن، ءتيىستى ساباقتار كەزىندە اي سايىن ەڭ تومەنگى جالاقى تولەۋ ەسكەرىلگەن. ەكىنشىدەن، جاۋىنگەرلىك جيىندار كەزىندە ورتاشا جالاقى تولەۋ جوسپارلانعان.
«اسكەري رەزەرۆتەگى ادام قىزمەت ەتكەن كەزدە جۇمىس ورنى ساقتالادى. زاڭدى قابىلداۋ الەۋمەتتىك تۇرعىدان ءتيىمدى. رەزەرۆكە قىزمەتكە كىرگەن ازاماتتىڭ كىرىسى ارتادى. بۇل قىزمەتتى ەنگىزۋ بەيبىت ۋاقىتتا اسكەر سانىن ارتتىرماي، قويعان مىندەتتى ورىنداۋعا دايىن ازاماتتار سانىن دايارلاۋعا مۇمكىندىك بەرەدى»، - دەدى رۋسلان جاقسىلىقوۆ.
تاراتىلعان مالىمەتكە قاراعاندا، رەزەرۆكە ادامدار ەرىكتى تۇردە تارتىلادى. ولارعا دەنساۋلىق جاعدايى بويىنشا تالاپتار قويىلادى. سونىمەن قاتار، وفيسەرلەر 60 جاسقا دەيىن، ال سەرجانتتار مەن ساربازدار 50 جاسقا دەيىن بولۋى كەرەك. رەزەرۆتەگىلەر دايىندىقتى اسكەري بولىمدەردە وتەدى جانە ولارعا ءتيىستى قارۋ-جاراق پەن تەحنيكا بەكىتىلەدى.
«رەزەرتەگى قىزمەتتى 2025 جىلى قالىپتاستىرۋ جوسپارلانعان. وسى ۋاقىت ارالىعىندا بارلىق الەۋمەتتىك ماسەلەلەردى شەشۋ كەرەك. ءبىرىنشى كەزەڭدە رەزەرۆكە 2 مىڭعا جۋىق ادامدى شاقىرتۋ ەسكەرىلگەن. بۇل باعىتتا جىلىنا 3،5 ملرد تەڭگە شاماسىندا قاراجات كەرەك. وسى جۇيەنى نىعايتقاننان كەيىن، الداعى ۋاقىتتا رەزەرۆتەگىلەر سانى ارتا تۇسەدى»، - دەدى ۆەدومستۆو باسشىسى.