مارقۇم شەرزات پولاتتىڭ اكەسىنىڭ ۇستىنەن قىلمىستىق ءىس قوزعالدى، دەپ حابارلايدى aqshamnews.kz.
الماتى وبلىسىنىڭ پوليسيا دەپارتامەنتى 10 جەلتوقسان كۇنى ۇستالعان قارجاۋباي نۇرىموۆتىڭ ۇستىنەن بوتەننىڭ مۇلكىن قاساقانا ءبۇلدىرۋ فاكتىسى بويىنشا قىلمىستىق ءىس قوزعالعانىن حابارلادى.
پوليسيا مالىمەتىنشە، 10 جەلتوقساندا ەڭبەكشىقازاق اۋدانىنىڭ ازات اۋىلىندا بولعان جەرلەۋ ءراسىمى كەزىندە اۆتوكولىك يەسىنە ماتەريالدىق زالال كەلتىرىلگەن.
- بۇل اكىمشىلىك جاۋاپكەرشىلىك شەگىنەن ەداۋىر اسىپ، ىس-ارەكەتتىڭ قىلمىستىق سارالانۋىنا اكەپ سوعادى. قازىرگى ۋاقىتتا وقيعانىڭ بارلىق ءمان-جايدى انىقتاۋ ماقساتىندا جان-جاقتى، تولىق جانە وبەكتيۆتى تەرگەۋ جۇرگىزىلىپ جاتىر، - دەپ حابارلادى دەپارتامەنتتەن.
ول ەكى جىلعا دەيىن باس بوستاندىعىنان ايىرىلۋى مۇمكىن.
ايتا كەتەتىنى، قىلمىستىق كودەكستىڭ 202-بابى بويىنشا قىلمىستىق ءىس جۇرگىزىلگەن جاعدايدا ايىپتالۋشى:
- بەس جۇزدەن ەكى مىڭ اەك-كە دەيىنگى مولشەردە ايىپپۇل تولەۋگە؛
- نە سول مولشەردە تۇزەتۋ جۇمىستارىنا، نە ءۇش جۇزدەن التى ءجۇز ساعاتقا دەيىنگى مەرزىمگە قوعامدىق جۇمىستارعا تارتۋعا؛
- نە ەكى جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى.
ەسكە سالايىق، بۇعان دەيىن سوت شەشىمىمەن قارجاۋباي نۇرىموۆ 15 تاۋلىككە قامالعان بولاتىن.