عالىمدار انىقتاعانداي، پينگۆين سەكىلدى ۇشا المايتىن قۇستاردى قوسا العاندا، الەمدە ءار ادامعا شامامەن 6 قۇستان كەلەدى ەكەن. بۇل جايىندا اlmaty-akshamy.kz پورتالى SciTechDaily اقپارات كوزىنە سىلتەمە جاساي وتىرىپ ءمالىم ەتەدى.
بۇل تاراپتا ارنايى زەرتتەۋ جۇرگىزگەن اۆسترالياداعى جاڭا وڭتۇستىك ۋەلس ۋنيۆەرسيتەتى عالىمدارىنىڭ ەسەبىنشە، بۇگىندە الەم بويىنشا شامامەن 50 ملرد جابايى قۇس بار. ياعني، قاۋىرسىن ءجۇندى قۇستاردىڭ قاراسى 8 ملرد-قا جاقىنداعان ادامزات سانىنا شاققاندا التى ەسە كوپ بولىپ شىقتى.
اۆستراليالىق عالىمدار توبى ورنيتولوگتارعا جانە اۋەسقويلارعا ناقتى ۋاقىت ارالىعىندا (رەجيمدە) قۇستار تۋرالى جان-جاقتى مالىمەت ۇسىناتىن eBird ونلاين بازاسىندا تىركەلگەن دەرەكتەردى، دالىرەگى، ءبىر ميللياردقا جۋىق دەرەكتى بىرىكتىرىپ زەردەلەگەن ەكەن.
اتالعان بازانىڭ 600 مىڭنان اسا پايدالانۋشىسى 2010-2019 جىلدار ارالىعىندا قۇستاردى باقىلاعان بولىپ شىقتى – قانداي قۇس قاي وڭىردە كەزدەسكەنى تىركەلىپ وتىرعان. وسى تاسپاعا تارتىلعان جازبالاردى پايدالانعان عالىمدار بۇگىندە 92 مىڭنان اسا قۇستىڭ ءتۇرى بارىن انىقتاپ بىلگەن. ولاردىڭ 8 پايىزى تابيعاتتا وتە سيرەك كەزدەسەتىن تۇرلەرىنەن تۇرادى.
تەك قۇستىڭ ءتورت ءتۇرىنىڭ سانى عانا ءبىر ميللياردتان اسادى: ءۇي قارعاسى، كادىمگى ساۋىسقان، دەلاۆەر شاعالاسى جانە قارلىعاش. قۇستاردىڭ 1180 ءتۇرىنىڭ سانى 5 مىڭنان اسپايتىندىقتان، ولار قورعاۋعا مۇقتاج.