قاراۋسىز قالعان جەردە سكۆەر: الماتىنىڭ «قاراسۋ» شاعىن اۋدانىندا ۇزىندىعى 800 م جاياۋ جۇرگىنشىلەر اللەياسى سالىنادى
الماتىنىڭ «قاراسۋ» شاعىن اۋدانىنداعى قاراۋسىز قالعان جەر سكۆەرگە اينالاتىن بولادى. بۇل تۋرالى مەگاپوليس باسشىسى ەربولات دوسايەۆتىڭ جۇمىس ساپارى بارىسىندا الاتاۋ اۋدانىنىڭ اكىمى ازامات قالدىبەكوۆ مالىمدەدى، دەپ حابارلايدى almaty-akshamy.kz
«تۇرعىندار سكۆەر جاساۋدى سۇرادى، نەگىزىنەن، ءبىز اعاش وتىرعىزۋدى قاراستىرامىز، ەبج استىنا الاسا اعاشتار مەن بۇتالاردى وتىرعىزۋدى جوسپارلاپ وتىرمىز، سونداي - اق برۋسچاتكالى اللەيا بولادى، ورىندىقتار، ۋرنالار قويىلادى، سۋارۋ جۇيەلەرى بولادى»، - دەدى الاتاۋ اۋدانىنىڭ اكىمى ازامات قالدىبەكوۆ.
سونىمەن قاتار، 4000-عا جۋىق اعاش وتىرعىزۋ، سۋارۋ جۇيەسىن جۇرگىزۋ قاراستىرىلعان. شاعىن اۋدان تۇرعىندارى بولاشاقتا دەمالاتىن اللەيانىڭ جالپى ۇزىندىعى – 800 م، اباتتاندىرۋ اۋماعى - 37 مىڭ م2 قۇرايدى.
«قاراۋسىز قالعان اۋماقتى رەتكە كەلتىرۋ، اعاش وتىرعىزۋ جانە اباتتاندىرۋ جوسپارلانۋدا. كوشەنىڭ باسقا بولىگىندەگى اللەيانىڭ جالعاسىن قولعا الماستان بۇرىن، وسى بولىكتەگى جۇمىستى اياقتاعان ءجون. بارلىعى قالاي جاسالاتىنى ءىس جۇزىندە كورەمىز. جۇمىستى ءارى قاراي جالعاستىرۋ وڭاي بولادى»، - دەپ ءتۇسىندىردى الماتى قالاسىنىڭ اكىمى ەربولات دوسايەۆ.
سونداي-اق، تۇرعىندار قالا اكىمىنەن قاراسۋ شاعىن اۋدانىنا جاڭا باعىتتى ىسكە قوسۋدى سۇرادى. ەربولات دوسايەۆ قالالىق موبيلدىلىك باسقارماسىنا جاڭا باعىتتى ەنگىزۋ مۇمكىندىگىن قاراستىرۋدى تاپسىردى، ءبىراق ەڭ الدىمەن جولدى جوندەۋدى اياقتاۋ قاجەت.