مۇنايشىلاردىڭ ەڭبەگى
اتىراۋعا جۇمىس ساپارىمەن بارعان ق ر پرەمەر-مينيسترى ءاليحان سمايىلوۆ مەملەكەت باسشىسىنىڭ تاپسىرماسى بويىنشا «ەمبىمۇنايگاز» اق كومپانياسىنىڭ قۇرىلعانىنا 100 جىل تولۋىنا ورايلاستىرىلعان سالتاناتتى جيىنعا قاتىستى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
پرەمەر-مينيستر ءوز سوزىندە ق ر پرەزيدەنتى قاسىم-جومارت توقايەۆ مۇناي-گاز سەكتورىن ەكونوميكانىڭ باسىم باعىتتارىنىڭ ءبىرى رەتىندە دامىتۋدىڭ ماڭىزدىلىعىن، سونداي-اق تاۋەلسىز قازاقستاننىڭ دامۋىندا سالانىڭ جانە وتاندىق مۇنايشىلاردىڭ ەڭبەگى زور ەكەنىن ۇدايى ەرەكشە اتاپ وتەتىنىن ايتتى.
ءاليحان سمايىلوۆتىڭ سوزىنشە، قازاق مۇنايىنىڭ باستاۋىندا تۇرعان كاسىپورىننىڭ 100 جىلدىق مەرەيتويى – بۇل ايتۋلى مەرەكە، ويتكەنى قاراشۇڭگىل جەرىنەن تابىلعان «قارا التىن» ەلىمىزدىڭ برەندىنە اينالدى. ماسەلەن، 1899 جىل قازاقستان تاريحىنا جىلىوي اۋدانىندا مۇناي كوزى تابىلعان جىل رەتىندە ەندى. 1922 جىلى ترەست بولىپ قۇرىلعان «ەمبىمۇنايگاز» – بۇگىن ءوز باعىتىن ناقتى ايقىنداعان، اياعىنا نىق تۇرعان قۋاتتى كاسىپورىن.
«ەمبىلىك گەولوگتار ەلىمىزدىڭ باتىس ايماعىنداعى ءىرى مۇناي كەنىشتەرىن اشۋدا زور ەڭبەك ءسىڭىردى. سونىڭ ارقاسىندا مۇناي-گاز سالاسى ەل ەكونوميكاسى دامۋىنىڭ لوكوموتيۆىنە اينالدى»، — دەدى ءاليحان سمايىلوۆ.
پرەمەر-مينيستر ءبىر عاسىرلىق تاريحى بار «ەمبىمۇنايگاز» كاسىپورنى قانشاما داڭقتى مۇنايشىلار اۋلەتىن تاربيەلەپ، مىڭداعان ۇلتتىق كادر دايىنداپ شىعارعانىن ايتتى.
«جەر قويناۋىنداعى قازبا بايلىقتى ىزدەۋدەن باستاپ، ونى يگەرۋ مەن دامىتۋ مول قاجىر-قايراتتى، تەرەڭ ءبىلىم مەن تاباندىلىقتى تالاپ ەتەدى. وسىنداي قيىنشىلىقتارعا توتەپ بەرىپ، مۇناي ءوندىرىپ، ەل يگىلىگىنە ۇلەس قوسقان مۇنايشىلار ەڭبەگى ەشقاشان ۇمىتىلمايدى! مەملەكەت باسشىسى قازاقستان حالقىنا جولداۋىندا قاراپايىم ەڭبەك ادامىنا قۇرمەت كورسەتىلۋ كەرەكتىگىن اتاپ ءوتتى»، — دەدى ءاليحان سمايىلوۆ.
ءسوز سوڭىندا پرەمەر-مينيستر بۇگىنگى تاڭدا «ەمبىمۇنايگاز» الەۋمەتتىك جاۋاپكەرشىلىگى رەتىندە اتىراۋ وبلىسىنىڭ دامۋىنا دا جان-جاقتى قولداۋ كورسەتىپ كەلە جاتقانىن اتاپ ءوتتى. سونىمەن قاتار ۇكىمەت باسشىسى ق ر پرەزيدەنتىنىڭ اتىنان 25 ارداگەر مەن سالا قىزمەتكەرلەرىنە ءتۇرلى مەملەكەتتىك ناگرادالار تابىس ەتتى.