اۋىل شارۋاشىلىعى ءمينيسترى ەربول قاراشوكەيەۆ سەناتتا وتكەن ۇكىمەت ساعاتىندا ءجۇن وڭدەۋ سالاسىنىڭ پروبلەمالارى تۋرالى ايتتى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
«ءجۇن وڭدەۋدەگى پروبلەمالار تەرى وڭدەۋ پروبلەمالارىنا ۇقساس - شيكىزات ساپاسىنىڭ تومەندىگى. رەسپۋبليكادا جىل سايىن 40 مىڭ تونناعا جۋىق قوي ءجۇنى وندىرىلەدى، ونىڭ تەك 33% نەمەسە 13،3 مىڭ تونناسىن وڭدەۋگە پايدالانۋعا بولادى. ءجۇننىڭ 67%-ى قىلشىق جانە جارتىلاي قىلشىقتى ءجۇن، ول ءىس جۇزىندە وڭدەلمەيدى جانە توقىما ونەركاسىبىندە سۇرانىسى جوق. كيىز جانە كيىزدەن جاسالعان اياق كيىم فابريكالارى از عانا بولىگىن وڭدەيدى. بيىلعى اقپان ايىندا اۋىل شارۋاشىلىعى مينيسترلىگى ءجۇندى ەكسپورتتاۋعا كەدەندىك باجداردى الىپ تاستاۋعا باستاماشىلىق جاسادى»، - دەدى قاراشوكەيەۆ.
ول اتاعانداي، ءجۇن وڭدەۋ ۇلەسىنىڭ تومەن بولۋ ماسەلەسىنىڭ شەشىمى قىلشىقتى جانە جارتىلاي قىلشىقتى ءجۇندى وڭدەيتىن كاسىپورىندار قۇرۋ.
«ماسەلەن، اقتوبە وبلىسىندا قۋاتتىلىعى جىلىنا 2،1 مىڭ توننالىق قىلشىقتى ءجۇندى وڭدەيتىن «قازفيلتەك» ج ش س ينۆەستيسيالىق جوباسىن ىسكە قوسۋ جوسپارلانۋدا، ول جىلۋ وقشاۋلاعىش ماتەريالداردى دايىنداۋ ءۇشىن پايدالاناتىن بولادى. جوبانى ىنتالاندىرۋ ءۇشىن ينۆەستيسيالىق سۋبسيديالاۋ قاعيدالارىنا ينۆەستيسيالىق سالىمداردىڭ 25%-ىن وتەۋ ۇلەسى بار ءجۇندى وڭدەۋ جونىندەگى پاسپورت ەنگىزىلگەن»، - دەدى ول.
مينيستر اتاعانداي، باتىس قازاقستان اگرارلىق ۋنيۆەرسيتەتىنىڭ عالىمدارى جىلىجايلار ءۇشىن گيدروپونيكا رەتىندە قىلشىقتى جانە جارتىلاي قىلشىقتى ءجۇندى پايدالانۋ تەحنولوگياسىن ازىرلەۋ بويىنشا زەرتتەۋلەر جۇرگىزۋدە.
«زەرتتەۋدىڭ قورىتىندىسى بويىنشا تەحنولوگيالاردى ونەركاسىپتىك وندىرىسكە بەرۋ جوسپارلانۋدا.ناتيجەسىندە قىلشىقتى جانە جارتىلاي قىلشىقتى جۇنگە ىشكى نارىقتا سۇرانىستى تۋدىرۋعا جانە دايىن ءونىم تۇرىندە ەكسپورتقا شىعارۋ مۇمكىندىگى جوسپارلانىپ وتىر»، - دەدى ول.