ءىىم ەسىرتكى قىلمىسىنا قارسى ءىس-قيمىل دەپارتامەنتىنىڭ قىزمەتكەرلەرى وڭىرلىك بولىنىستەرمەن بىرلەسىپ، وسى ايدىڭ باسىنان باستاپ ەسىرتكىنىڭ ءىرى پارتيالارىن تاركىلەپ، ءبىرقاتار قىلمىسكەردى ۇستادى.
سينتەتيكالىق ەسىرتكى وندىرەتىن ەكى ەسىرتكى زەرتحاناسى جويىلدى. كەلىپ تۇسكەن اقپارات بويىنشا جەدەل قىزمەتكەرلەر الماتى قالاسىندا جامبىل وبلىسىنىڭ ەكى تۇرعىنىن ۇستادى، ولاردىڭ اۆتوكولىگىنىڭ سالونىندا 152 كگ گاشيش تابىلىپ، تاركىلەندى.
الماتى پوليسەيلەرى قالانىڭ 24 جاستاعى تۇرعىنىن ۇستادى، ونىڭ كولىگىندە جاسىرىپ ساتۋعا دايىندالعان 1،2 كگ پسيحوتروپتىق زات مەفەدرون تابىلدى. سەمەيلىك پوليسەيلەر ينتەرنەت-دۇكەننىڭ ەسىرتكى جاسىرۋشىسى بولىپ جۇمىس ىستەيتىن پاۆلودار وبلىسىنىڭ ەكى تۇرعىنىن قۇرىقتادى. ولاردان ءبىر كگ “ا-PVP” پسيحوتروپتىق زاتى تاركىلەندى.
ەسىرتكى زەرتحاناسىن ۇيىمداستىرعانى ءۇشىن الماتى قالاسىنىڭ تۇرعىنى ۇستالدى. ءتىنتۋ بارىسىندا ونىڭ جالدامالى پاتەرىنەن ەسىرتكى جاساۋ ءۇشىن پايدالانىلاتىن جابدىقتار، ەكى شىنى كولبا، كانيستر جانە 1،5 كگ مەفەدرون تابىلىپ، تاركىلەندى. 16 قاراشادا الماتى وبلىسى ۇزىناعاش كەنتىندە پوليسيا قىزمەتكەرلەرى ەسىرتكى زەرتحاناسىن ۇيىمداستىرعانى ءۇشىن الماتى قالاسىنىڭ ەكى تۇرعىنىن ۇستادى.
ءۇيدىڭ اۋماعىندا ورنالاسقان كونتەينەردى ءتىنتۋ بارىسىندا ءۇش توننادان استام پرەكۋرسور، ەلەكتروندىق تارازىلار، رەاكتور، شىنى كولبالار جانە 30 كگ دايىن مەفەدرون پسيحوتروپتىق زاتى تاركىلەندى.
«قاراشا ايىنان باستاپ ءىىم ەسىرتكى قىلمىسىنا قارسى كۇرەس بولىمشەلەرىنىڭ قىزمەتكەرلەرى زاڭسىز اينالىمنان 208 كگ ءتۇرلى ەسىرتكى زاتتارىن تاركىلەدى»، – دەدى ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى سارقىتباي قۇسايىنوۆ.