ونىڭ ايتۋىنشا، ستۋدەنتتەر حاراسسمەنتكە ۇشىراۋ ىقتيمالدىعى وتە جوعارى توپ.
ءماجىلىس دەپۋتاتى قاراقات ابدەن وتباسىنداعى زورلىق-زومبىلىقتىڭ الدىن الۋ كەزەك كۇتتىرمەي شەشەتىن ماسەلەگە اينالعانىن اتاپ ءوتىپ، پرەمەر-مينيستردىڭ ورىنباسارى تامارا دۇيسەنوۆاعا ساۋال جولدادى، دەپ حابارلايدى Almaty-akshamy.kz
«ەلدى ەلەڭ ەتكىزگەن سوڭعى حابارلار قوعامدىق سانانى ءدۇر سىلكىندىردى. وسى قورقىنىشتى جاڭالىقتار ىزىمەن حاراسسمەنت وقيعالارى دا تەز تارادى. جاقىندا استانا مەديسينا ۋنيۆەرسيتەتىندە پروفەسسور-وقىتۋشىنىڭ ستۋدەنتكە جاساعان جىنىستىق قىسىم فاكتىسى انىقتالدى. وسىدان كەيىن الىمجەتتىك كورگەن ستۋدەنتتەر ءوز وقيعالارىن الەۋمەتتىك جەلىدە بولىسە باستادى. جەكە وزىمە ءارتۇرلى وقۋ ورىندارىنىڭ ستۋدەنتتەرىنەن 100-دەن اسا حات كەلىپ ءتۇستى»، - دەپ ايتتى دەپۋتات.
قاراقات ابدەن ستۋدەنتتەر حاراسسمەنتكە ۇشىراۋ ىقتيمالدىعى وتە جوعارى توپ ەكەنىن العا تارتتى.
«جىنىستىق قىسىمعا ۇشىراعان ەلوردالىق بويجەتكەننىڭ ىسىمەن تانىسىپ، بۇل سالادا كەمشىلىكتەردىڭ كوپتىگىنە انىق كوزىمىز جەتىپ وتىر. ءدال بۇگىن ەلىمىزدىڭ وقۋ ورىندارىندا قانشا حاراسسمەنت وقيعاسى بولعانىن ءدوپ باسىپ ايتۋ قيىن. سەبەبى ستاتيستيكا جۇرگىزىلمەيدى. ال زاڭدا حاراسسمەنت ۇعىمى اتىمەن جوق. جالپى زورلىق-زومبىلىقتىڭ قاي ءتۇرىن بولسىن، حاراسسمەنتتى دە قاتاڭ قاراپ، زاڭ جوباسىنا ءبىرقاتار وزگەرتۋ مەن تولىقتىرۋ ەنگىزۋ قاجەتتىلىگى تۋىنداپ وتىر»، - دەيدى ول.
ابدەن كەشە عانا مەكتەپ ءبىتىرىپ، اۋىلىنان شىعىپ كورمەگەن اقۇرپەك بالاپانداي جاپ-جاس قىزداردى قورعاۋىمىز كەرەك ەكەنىن ايتتى. ول اتاعانداي، يبالى، كەيدە تىم ۇيالشاق، جاسقانشاق قازاق قىزى ءوز باسىنان وتكەن وسىنداي جاعدايدى ايتا بەرمەيدى.
دەپۋتات مىناداي ۇسىنىستار ايتتى:
حاراسسمەنتكە قاتىستى ءانونيمدى ساۋالنامانى ەلىمىزدىڭ بارلىق جوعارى وقۋ ورىندارىندا تاۋەلسىز تۇردە وتكىزۋدى؛
پروفەسسورلىق-وقىتۋشىلىق قۇرام مەن بارلىق ستۋدەنت قىزدارعا حاراسسمەنتكە قاتىستى زاڭنامالىق-قۇقىقتىق تۇسىندىرمە جۇمىستارىن جۇرگىزۋدى؛
بارلىق جوعارى وقۋ ورىندارىنىڭ جارعىسىنا حاراسسمەنت تۋرالى ناقتى ەرەجەلەر ەنگىزۋدى سۇرايمىز!
ونىڭ مالىمەتىنشە، باس پروكۋراتۋرانىڭ دەرەكتەرى بويىنشا 2023 جىلدىڭ 10 ايىندا تۇرمىستىق زورلىق-زومبىلىقتان 85 ايەل قازا تاپقان.
دەپۋتات كەلەسى جىلدى زورلىق-زومبىلىققا قارسى كۇرەس جىلى دەپ جاريالاۋدى ۇسىندى.