بۇل ءىس بويىنشا 22 ادامعا ايىپ تاعىلعان.
وزبەكستاندا 1-2 شىلدەدە قاراقالپاقستاندا بولعان تارتىپسىزدىكتەرگە قاتىستى قىلمىستىق ءىس بويىنشا سوت پروسەسى باستالدى. بۇل ءىس بويىنشا بارلىعى 22 ادامعا ايىپ تاعىلعان، دەپ حابارلايدى Almaty-akshamy.kz Inbusiness.kz سىلتەمە جاساپ.
قىلمىستىق ءىستى وزبەكستان قۇرامىنداعى قاراقالپاق رەسپۋبليكاسىنىڭ قىلمىستىق ىستەر بويىنشا سوت القاسىنىڭ ءتوراعاسى ە. ابيبۋللايەۆ باستاعان بۇحارا وبلىستىق سوتى قارايدى.
سوتتالۋشىلارعا كونستيتۋسيالىق قۇرىلىمعا قول سۇعۋ، شابۋىل جاساۋ، قوعامدىق قاۋىپسىزدىك پەن تارتىپكە ءقاۋىپ توندىرەتىن ماتەريالداردى دايىنداۋ، ساقتاۋ جانە تاراتۋ، قارۋ-جاراق پەن وق-دارىلەردى ساقتاۋ، قاساقانا اۋىر دەنە جاراقاتىن سالۋ، مەملەكەتتىك جانە جەكە مۇلىككە زيان كەلتىرۋ سياقتى قۇقىقبۇزۋشىلىقتار جاسادى دەگەن ايىپتاۋلار تاعىلدى.
نۇكىس وقيعاسىن زەرتتەگەن پارلامەنت كوميسسياسىنىڭ سۇراۋىمەن وزبەكستان باس پروكۋراتۋراسى ايىپ تاعىلعان تاعى دا 107 ادامدى "گۋمانيزم پرينسيپىمەن" بوستاندىققا شىعارعان.