ناۋرىز ايى سوڭعى اپتاسىنا اياق باستى. جاڭا تۋعان اي جاۋىنى، جەلى كوپ «قۇس قاناتى»، «الاساپىران» امالدارىنىڭ تابالدىرىقتان اتتاعانىن اڭعارتقانداي شالقالاپ جاتىر
انە-مىنە دەگەنشە، ناۋرىز ايىنىڭ سوڭعى اپتاسى كەلىپ جەتتى. «سامارقاننىڭ كوك تاسى» ءجىبيتىن كۇن (22 ناۋرىز) ءوتتى. ۇلىستىڭ ۇلى كۇنى ەلىمىزدە بۇرىن-سوڭدى بولماعان جاڭالىق-ەرەكشەلىكتەرىمەن اتالىپ ءوتتى. ناۋرىز مەرەكەسى مۇسىلماننىڭ قاسيەتتى رامازان ايىنا ۇلاسىپ، نۇر ۇستىنە نۇر اكەلدى.
كۇن مەن ءتۇن تەڭەسكەسىن، كۇن جىلىپ، جەر ءجىبىپ، شۋاقتى مەزگىل باستالۋى - تابيعات زاڭدىلىعى. ءبىراق شۋاقتى شاقتار ءالى تۇراقتاماي تۇر.
وتكەن پايىمىمىزدا: «...كۇنى كەشە ەرتەڭگىلىك جەرگە قىراۋ ءتۇستى. بۇرىنعىنىڭ شالدارى ناۋرىزدىڭ ورتاسىندا ءبىر كۇندىك «بەسقوناق» بولادى دەۋشى ەدى، سونىڭ اسەرى مە ەكەن، نە دە بولسا، بۇل كورىنىستەر ساقتىق شاراسىنا شاقىرىپ تۇرعانداي...» دەپ جازعان ەدىك. سول جورامالىمىز بەكەر بولماعان سەكىلدى. سوڭعى 5-6 كۇننىڭ بەدەرىندە تاڭەرتەڭگىلىك پەن كەشكى ۋاقىتتا دەنەنى توڭدىرعان سالقىن لەپ تولاستاماي تۇر. جاڭا تۋعان ايدى كوردىك. جاۋىنى مەن جەل-داۋىلى كوپ «قۇس قاناتى»، «الاساپىران» امالدارىنىڭ تابالدىرىقتان اتتاعانىن اڭعارتقانداي شالقالاپ جاتىر...
سوڭعى «تۇياق سەرپەر» اپتادا امال دا از ەمەس. سولاردىڭ ءبىرى – «قۇس قاناتى» امالى. ناۋرىز ايىنىڭ سوڭعى كۇندەرىندە جىل قۇستارى ۇشىپ كەلە باستايدى. ولاردىڭ كەلۋىمەن قار ارالاس جاڭبىر جاۋىپ، سۋىق جەل تۇرادى. مۇنى ەل «قۇس قاناتى» دەپ اتاعان.
ناۋرىز ايىنىڭ سوڭىندا، كەيدە ءساۋىردىڭ باسقى كەزىندە قار كۇرت ەرىپ، جەر لايساڭ بولىپ، شارۋاشىلىققا قيىن كۇندەر تۋادى. وسىنداي جايسىز دا قولايسىز مەرزىم ءوز بولمىسىنا قاراي، «الاساپىران» دەپ اتالعان.
ءقازىر سيىرعا «ورازا» ۇستاتقان «ابدىكەي» امالى اياقتالىپ كەلەدى. قالىڭ قاردىڭ شەتى سوگىلىپ، ەرىپ، ساي-سالا سۋعا تولىپ جاتىر. جەر استى توڭى ءجىبي باستايدى. «قاردان اققان سۋعا تورعاي شومىلاتىنداي بولسا، جاز ەرتە شىعادى دەپ، قاردان اققان سۋ ماردىمسىز بولسا، جاز ءجاي شىعادى دەپ» كونەكوز قاريالاردىڭ جورامال جاسايتىنى وسى كەز.
ناۋرىزدا ءوتىپ بولمايتىن ۇزاق كۇندەر – «ۇزىنسارى» كەلىپ، قوڭتورعايلاۋ قاراوزەك شاق تۋادى. ناۋرىزدا اتان تۇيەنى جىعار، كوكتەمنىڭ قار ەرىتەر «التىن كۇرەك» وكپەك جەلى، قاراسۋىعى بار.
بۇگىن قولدانىستاعى كۇنتىزبە بويىنشا، ايدىڭ – 25ء-ى. اي جۇيەسى بويىنشا، 3ء-ى. ال قازاقى ەسەپكە سۇيەنسەك، ناۋرىز ايىنىڭ –12- ءسى. جوعارىدا ءبىز ايتقان امالداردىڭ ءازىر ىقپالى بايقالمايدى. اسپان اشىق، كۇن شۋاقتى. دەگەنمەن، بۇعان قاراپ كوكتەم شىعىپ كەتتى دەۋگە ەرتەرەك. ءالى الدا تالاي جاۋىندى دا داۋىلدى كەزدەر بار ەكەنى ءشۇباسىز...