ۇستاز ابىلاي ماران ۇلىنىڭ ءمۇعالىم قىزمەتىن اتقارىپ كەلە جاتقانىنا 11 جىل بولدى، ول مەكتەپتە حيميا پانىنەن ساباق بەرەدى. وسى ۋاقىت ىشىندە ۇستاز حالىقارالىق ينتەللەكتۋالدىق سايىستاردىڭ 10-نان استام جەڭىمپازىن تاربيەلەپ شىعاردى. بيىل ونىڭ شاكىرتتەرىنىڭ ءبىرى ماديار ءقاسىمالى حيميادان بەدەلدى IChO حالىقارالىق وليمپياداسىندا التىن مەدال جەڭىپ الدى، دەپ حابارلايدى Almaty-akshamy.kz Inform.kz-كە سىلتەمە جاساپ.
«ابىلاي ساماتوۆ تالاپشىل بولسا دا، وتە مەيىرىمدى ۇستاز. ول بىزگە ۇنەمى قولداۋ ءبىلدىرىپ، باعىت كورسەتىپ وتىرادى. ول قاراپايىمدىلىق، ەڭبەكسۇيگىشتىك سياقتى قاسيەتتەردى بويىمىزعا ءسىڭىردى. ابىلاي ماران ۇلى بىزگە مورالدىق قولداۋ كورسەتىپ، بىزبەن تەڭ دارەجەدە سويلەسەدى. ول دا مەكتەپتە وقىپ جۇرگەندە وليمپيادالاردىڭ جەڭىمپازى بولعان جانە بىزبەن جارىستارعا قاتىسقانداعى تاجىريبەسىمەن بولىسەدى. ابىلاي ماران ۇلىنىڭ اڭگىمەلەرى بىزگە جاڭا بەلەستەردى باعىندىرۋعا كۇش-جىگەر بەرەدى. ۇستازىما ايتار العىسىم شەكسىز. ابىلاي ماران ۇلى مەن اتا-انامنىڭ قولداۋى مەن ەڭبەگىنىڭ ارقاسىندا حيميا پانىنەن حالىقارالىق وليمپيادادا ەكى رەت جەڭىمپاز اتاندىم. بىلتىر كۇمىس جۇلدەگەر اتانسام، بيىل التىن مەدال جەڭىپ الدىم» ، - دەدى IChO جەڭىمپازى ماديار ءقاسىمالى ۇستازى تۋرالى.
سوڭعى بەس جىلدا ۇستاز ابىلاي ساماتوۆتىڭ شاكىرتتەرى حيميادان IChO حالىقارالىق وليمپياداسىنىڭ، حالىقارالىق مەندەلەيەۆ وليمپياداسىنىڭ جەڭىمپازى اتانرعان.
سونداي-اق ول جاڭارتىلعان وقۋ باعدارلاماسىنا ارنالعان حيميا وقۋلىعىنىڭ بىرلەسكەن اۆتورى.
پەداگوگ ءوز ەڭبەگى ءۇشىن ءبىلىم باسقارماسىنىڭ، ءبىلىم جانە عىلىم مينيسترلىگىنىڭ قۇرمەت گراموتاسىمەن ماراپاتتالعان.
سونداي-اق «حالىقارالىق وليمپيادا جەڭىمپازدارىن تاربيەلەگەن ۇزدىك پەداگوگ» نوميناسياسى بويىنشا قاراعاندى وبلىسى اكىمى سىيلىعىنىڭ، «ۇزدىك پەداگوگ-2018» توسبەلگىسىنىڭ يەگەرى.
«ماعان بالالارمەن جۇمىس ىستەگەن ۇنايدى. ولاردى ىنتالاندىرۋ، تالانتىن اشۋ جانە ولارعا سەنۋ ماڭىزدى. بىزدە دارىندى بالالار وتە كوپ. ەڭ باستىسى - ءار وقۋشىمەن ءتىل تابىسا ءبىلۋ كەرەك، سوندا ناتيجە دە بولادى. ولارعا سەنىم مەن قولداۋ كورسەتۋ جاڭا بەلەستەردى باعىندىرىپ، بيىك جەڭىستەرگە جەتۋگە كومەكتەسەدى» ، – دەيدى حيميا ءپانىنىڭ ءمۇعالىمى ابىلاي ساماتوۆ.