ءورت جاي تۇسكەننەن بولۋى مۇمكىن دەگەن الدىن الا بولجام جاسالدى.
قاراعاندى وبلىسىندا ءبىر مەزەتتە بىرنەشە جەردەن دالا ءورتى شىققان، دەپ حابارلايدى Almaty-akshamy.kz Inbusiness.kz سىلتەمە جاساپ.
قارقارالى اۋدانىنىڭ قوياندى اۋىلدىق وكرۋگىندە 20 ماۋسىمدا پايدا بولعان ءىرى دالا ءورتى 21 ماۋسىمدا جويىلدى. مۇندا 1500 گا الاڭداعى ءشوپ جانىپ كەتكەن.
ءورتتى سوندىرۋگە قاراعاندى وبلىسىنىڭ تجد، ورتكە قارسى ەرىكتى قۇرىلىمداردىڭ جانە ورمان شارۋاشىلىعىنىڭ 57 ادامى مەن 9 بىرلىك تەحنيكاسى جۇمىلدىرىلدى.
سونىمەن قاتار، 21 ماۋسىم كۇنى ساعات 14:58-دە قارقارالى اۋدانىندا قۋ ورمان-توعاي شارۋاشىلىعىندا ءورت شىققانى تۋرالى حابارلاما توتەنشە جاعدايلار قىزمەتىنە تۇسكەن.
ءورتتى سوندىرۋگە توتەنشە جاعدايلار ماماندارى جانە «التاي پوليمەتاللى» ءجشس-نىڭ 270 ادامى مەن 43 تەحنيكاسى جۇمىلدىرىلدى. جەرگىلىكتى جەردىڭ تۇرعىندارى دا كۇندىز ءتۇنى ءورت ءسوندىرۋ قامىمەن جۇرگەن. اتالمىش اۋماقتان 250 گەكتار جەر جانىپ كەتكەن. اۋدان اكىمى ەرلان قۇسايىننىڭ مالىمەتىنشە، بۇگىن ءتىلسىز جاۋ اۋىزدىقتالعانمەن، ءالى دە بىقسىپ جاتقان جەرلەرى بار. تابيعي ءورتتى سوندىرۋگە وسى جەرگە باسقا وبلىستان تىكۇشاق جىبەرىلگەن.
بۇقار جىراۋ اۋدانىندا ەكى دالا ءورتى تىركەلگەن. ءبىرىنشى ءورت - قىزىلتاۋ اۋدانى شاتقالىندا 40 گا الاڭدا قۇرعاق ءشوپ جانە 2 گا الاڭدا بۇتالار جاندى. ءورت تجد، ەرىكتىلەر جانە ورمان شارۋاشىلىعى كۇشتەرىمەن ءسوندىرىلدى. ەكىنشى ءورت 21 ماۋسىم كۇنى كەشكە تورتكول اۋىلىنان 20 شاقىرىم جەردە تىركەلدى. قۇرعاق ءشوپتىڭ جانۋى، الدىن الا بولجام بويىنشا، 100 گا اۋماقتا جانە 1،5 گا اۋماقتا ورىن العان. ءورت 22 ماۋسىمدا ساعات 05:25-تە سوندىرىلگەن.
سونىمەن قاتار، 21 ماۋسىمدا تجد كۇشتەرى وساكاروۆ اۋدانىنىڭ جانسارى اۋىلدىق وكرۋگىندەگى ءىرى دالا ءورتىن سوندىرۋگە جۇمىلدىرىلدى. جالپى جانۋ اۋماعى قۇرعاق شوپتەن قۇرالعان 1200 گا اۋماقتا ورىن الدى. ءورتتى سوندىرۋگە قاراعاندى وبلىسى جانە پاۆلودار وبلىسىنىڭ تجد، ەرىكتى ورتكە قارسى جانە ورمان شارۋاشىلىعىنان 26 ادامى مەن 8 تەحنيكا جۇمىلدىرىلدى. ءورت 22 ماۋسىمدا ساعات 00:20-دا جويىلدى.
قۇتقارۋشىلار سۋ الاتىن وزەن، سۋ قويمالارىنىڭ سول اۋماققا قاشىق بولۋى ءارى جەلدىڭ كۇشەيىپ كەتۋى جاعدايدى ۋشىقتىرا ءتۇستى دەپ وتىر. ايتۋلارىنشا، بۇگىندە وبلىستاعى دالا ءورتى قاداعالاۋعا الىنعان، ورمان ورتىنە ۇلاسۋ ءقاۋپى جوق.