بوريس كەرىمبايەۆتى ەسكە الۋعا ارنالعان كونفەرەنسيا ءوتتى
جازۋشىلار وداعىنىڭ ءماجىلىس زالىندا اۋعان سوعىسىنىڭ ارداگەرى بوريس كەرىمبايەۆتى ەسكە الۋ قۇرمەتىنە ارنالعان «ەر ەسىمى – ەل ەسىندە» اتتى عىلىمي-پراكتيكالىق كونفەرەنسيا ءوتتى.
الماتى اكىمدىگىنىڭ قولداۋىمەن «ۇلى دالا» قوعامدىق بىرلەستىگى، رەسپۋبليكالىق اۋعان سوعىسى ارداگەرلەرى مەن مۇگەدەكتەرى زتب ورتالىق كەڭەسى ۇيىمداستىرعان باسقوسۋ جيىندا اۋعان سوعىسى تاريحىنا «قارا مايور» ەسىمىمەن ەنگەن بوريس توكەن ۇلى كەرىمبايەۆتىڭ ءومىر جولى، مايدان جولى جايلى قوعام قايراتكەرلەرى مەن عالىمدار بايىپتى بايانداما جاساپ، ونىڭ كەيىنگى ۇرپاققا ۇلاعاتى ايتىلدى، باتىردىڭ رۋحىنا تاعزىم ەتىلدى. كسرو قم ببب (گرۋ)ء-دىڭ كەرىمبايەۆ قولباسشىلىق ەتكەن جاساعى ورتالىق ازيالىق سايدىڭ تاسىنداي ىرىكتەلگەن ساقاداي ساي ساردارلار مەن ساربازدار بولاتىن. اۋعان جەرىندەگى پاندجەر شاتقالىن جىل بويى تاس قامال قىپ قورعاعان «قارا مايوردى» قارسىلاسى، اتىشۋلى اۋعان كومانديرى احماد شاح ءماسۋدتىڭ ءوزى امالسىز مويىنداپ، ونىڭ باسىنا ميلليون دوللار تىككەن دەسەدى.
زاپاسقا شىققان وفيسەر كەرىمبايەۆ تاۋەلسىز ەلىمىزدىڭ اسكەري قىزمەتشىلەرىمەن ءوزىنىڭ وراسان زور تاجىريبەسىمەن ءبولىسىپ، جاستاردى ەل قورعاۋعا تاربيەلەپ، وتان[1]شىلدىققا باۋلىدى. كونفەرەنسياعا قاتىسقان اۋعان سوعىسىنىڭ ارداگەرلەرى، بەلگىلى قوعام قايراتكەرلەرى، عىلىم مەن مادەنيەت وكىلدەرى كەرىمبايەۆتىڭ جاۋىنگەرلىك جولى – انتقا ادالدىق پەن ەرلىككە تولى ەكەنىنە توقتالدى .كونفەرەنسياعا قاتىسۋشىلار بوريس كەرىمبايەۆتى ەسىمى ەلىمىزدىڭ سوعىستا ەرەن ەرلىگىمەن تانىلعان باتىرلار قاتارىنان ورىن الۋعا ابدەن لايىق دەگەن توقتامعا كەلدى.
مارات قويلىبايەۆ، رەسپۋبليكالىق اۋعان سوعىسى ارداگەرلەرى مەن مۇگەدەكتەرى زتب ورتالىق كەڭەسىنىڭ ءتوراعاسى:
اسكەري انتىنا ادال بولدى
وتكەن عاسىردا تاعدىرى ماڭدايىمىزعا جازىلعان اۋعانستانداعى سوعىسقا ءبىز ينتەرناسيونالدىق بورىشىمىزدى وتەۋگە باردىق. بوريس كەرىمبايەۆ – سول سوعىستا قولباسشى (كوماندير) رەتىندە قانشاما ساربازدىڭ ەلگە ءتىرى كەلۋىنە بارىن سالعان سۇڭعىلا ساردار. بىزگە ماڭىزدىسى – اسكەري انتىنا اقىرىنا دەيىن ادال بولعان كەرىمبايەۆتىڭ كەرەمەت ەرلىك ۇلگىسىن وسكەلەڭ ۇرپاققا ونەگە ەتۋ. ونىڭ ەر جىگىتكە ءتان جىگەرلىلىگى مەن ۇستانىمدىلىعىن كەيىنگى ۇرپاق – جارقىن بولاشاقتىڭ جاستارى، ساربازدار مەن ساردارلار ءبىلۋى ءتيىس. ءبىز سوعىستى ىزدەگەن جوقپىز، سوعىس ءبىزدى تاپتى. ءبىز سوعىستى تىلەگەن جوقپىز، تىلەمەيمىز. ەندىگى جاستار بەيبىت زاماننىڭ باتىرلارى بولسىن!