اۋعان سوعىسىنىڭ ارداگەرى، ءبىرىنشى «مۇسىلمان باتالونىنىڭ» كومانديرى، پولكوۆنيك حابيبجان حولبايەۆ ارنايى كەلدى.
الماتىدا دەسانتتىق-شابۋىلداۋ اسكەرلەرى مەن ارنايى ماقساتتاعى 177ء-شى جاساقتىڭ اسكەري قىزمەتشىلەرى اۋعان سوعىسىنىڭ باتىرى بوريس كەرىمبايەۆ تۇرعان ءۇيدىڭ قابىرعاسىنا مەموريالدىق تاقتا ورناتتى، دەپ حابارلايدى Almaty-akshamy.kz.
باتىردى ەسكە الۋعا بوريس كەرىمبايەۆتىڭ تۋىستارى مەن جاقىندارى، دەسانتتىق-شابۋىلداۋ اسكەرلەرىنىڭ قولباسشىلىعى مەن جەكە قۇرامى، ءوزى العاشقى كومانديرى بولعان ارنايى ماقساتتاعى بولىمشەلەر، قۇرلىق اسكەرلەرى اسكەري ينستيتۋتىنىڭ جانە راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ كۋرسانتتارى جينالدى.
بوريس توكەن ۇلى تۇرعان ءۇيدىڭ جانىنا اۋعان سوعىسىنىڭ ارداگەرلەرى، «جاس سارباز» رەسپۋبليكالىق قوزعالىسى مەن قارا مايور اتىنداعى اسكەري-پاتريوتتىق كلۋبتىڭ تاربيەلەنۋشىلەرى ساپ تۇزەدى. بۇل ءىس-شاراعا 1979 جىلى ءاميننىڭ سارايىنا شابۋىل جاساۋشى، اۋعان سوعىسىنىڭ ارداگەرى، ءبىرىنشى «مۇسىلمان باتالونىنىڭ» كومانديرى، پولكوۆنيك حابيبجان حولبايەۆ ارنايى كەلدى.
ميتينگتى دەسانتتىق-شابۋىلداۋ اسكەرلەرىنىڭ قولباسشىسى، گەنەرال-مايور الماز جۇماكەيەۆ اشتى. ول قارا مايوردىڭ ءومىرى مەن اسكەري جولى، ونىڭ سىڭىرگەن ەڭبەگى، بوريس كەرىمبايەۆتىڭ باعا جەتپەس اسكەري تاجىريبەسى تۋرالى ايتتى.
«وسى ەسكەرتكىش تاقتانى اشا وتىرىپ، دەسانتتىق-شابۋىلداۋ اسكەرلەرىنىڭ قۇرامالارى مەن بولىمدەرىندە قارا مايوردى ەسكە الۋ بۇرىشى قۇرىلعانىن ايتقىم كەلەدى. جاس ساربازدار قىزمەت ەتۋگە كەلگەندە، ولارعا ءبىرىنشى كەزەكتە باتىردىڭ اسكەري جانە ءومىر جولى تانىستىرىلادى»، - دەپ اتاپ ءوتتى گەنەرال-مايور الماز جۇماكەيەۆ.
ءىس-شارا گۇل شوقتارىن قويۋمەن جانە سالتاناتتى شەرۋمەن اياقتالدى.
ايتا كەتەيىك، بوريس كەرىمبايەۆ - اۋعان سوعىسى كەزىندە اتى اڭىزعا اينالعان قولباسشى. ول 1981 جىلدان 1983 جىلعا دەيىن اۋعانستاندا بولدى. ءبىر جىلعا جۋىق ۋاقىت ىشىندە ونىڭ «ەكىنشى مۇسىلمان باتالونى» ستراتەگيالىق ماڭىزدى پاندجشەر شاتقالىن ۇستاپ تۇرىپ، كۇشى باسىم مودجاحەدتەرمەن شايقاس جۇرگىزدى. 177 جاساقتىڭ ءساتتى ارەكەتتەرىنىڭ ناتيجەسىندە مودجاحەدتەر وسى ماڭىزدى باعىتتاعى قيمىلدارىن توقتاتۋعا جانە بىتىمگە كەلۋگە ءماجبۇر بولدى.