ول مۋراتانىڭ 2012 جىلعى وليمپيادادا العان التىن مەدالى مەن بوكسشى WBA نۇسقاسى بويىنشا يەلىك ەتكەن بەلبەۋدىڭ جانىنا ورنالاستىرىلىپتى.
الەۋمەتتىك جەلىدە بوكسشى گەنناديي گولوۆكيننىڭ جەكپە-جەكتەن كەيىن جاپوندىق قارسىلاسى ريوتا مۋراتاعا جاپقان شاپانىنىڭ جاڭا سۋرەتتەرى پايدا بولدى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
قازاقتىڭ ۇلتتىق ويۋ-ورنەگىمەن كومكەرىلگەن شاپان جاپونياداعى ريوتا مۋراتانىڭ اۋەسقوي جانە كاسىپقوي بوكستەگى جەتىستىكتەرىنە ارنالعان ەكسپوزيسيالار زالىنا قويىلعان. ول مۋراتانىڭ 2012 جىلعى وليمپيادادا العان التىن مەدالى مەن بوكسشى WBA نۇسقاسى بويىنشا يەلىك ەتكەن بەلبەۋدىڭ جانىنا ورنالاستىرىلىپتى.
ەسكە سالساق، 9 ءساۋىر كۇنى گەنناديي گولوۆكين (41-1-1، 36 كو) جاپونيانىڭ سايتاما قالاسىندا وتكەن كاسىپقوي بوكس كەشىندە شارشى الاڭ يەسى ريوتا مۋراتانى (16-2، 13 كو) 9 راۋندتا نوكاۋتقا جىبەرگەن ەدى. گولوۆكين بۇل جەڭىسىنىڭ ارقاسىندا WBA Super، IBF جانە IBO نۇسقالارى بويىنشا چەمپيوندىق تيتۋلداردىڭ يەسى اتاندى.
جەكپە-جەكتەن كەيىن GGG جاپوندىق قارسىلاسى ريوتا مۋراتاعا شاپانىن تارتۋ ەتتى، ول بۇرىن ەشبىر قارسىلاسىنا مۇنداي قۇرمەت كورسەتپەگەن. چەمپيون بۇعان دەيىن ءار جەكپە-جەككە وسى شاپانىن كيىپ شىعاتىن ەدى، دەپ جازدى Sports.kz.
«مۋراتا ءجۇزى جىلى، جىميىپ جۇرەدى. وعان دەگەن جاقىندىقتى سەزىندىم جانە مەن ونى قاتتى قۇرمەتتەيمىن. مەن ونى كەرەمەت چەمپيون دەپ ەسەپتەيمىن. شاپان – قازاقتىڭ ۇلتتىق كيىمى. ونى ەڭ قۇرمەتتى ادامعا جاباتىن ءداستۇر بار. سول سەبەپتى، ونى مۋراتاعا جاپتىم»، - دەگەن بولاتىن گەنناديي گولوۆكين.