قارا التىن قىمباتتاي باستادى

نيۋ-يورك تاۋار بيرجاسىنىڭ (NYMEX) ەلەكتروندىق ساۋدا-ساتتىعىندا WTI ماركالى قارا التىننىڭ ماۋسىم ايىنداعى فيۋچەرستەرىنىڭ باعاسى باررەلىنە 0،63 دوللارعا دەيىن ءوسىپ (0،92%)، 69،19 دوللاردى قۇرادى. الدىڭعى سەسسيانىڭ قورىتىندىسى بويىنشا كەلىسىمشارتتاردىڭ قۇنى باررەلىنە 0،04 دوللارعا ازايىپ (0،1%)، 68،56 دوللاردى قۇرادى.

جۋىردا ەۋروپالىق ورتالىق بانك ءۇش نەگىزگى پايىزدىق مولشەرلەمەنى 25 بازيستىك تارماققا كوتەردى. وعان سايكەس نەسيەلەر بويىنشا بازالىق پايىزدىق مولشەرلەمە 3،75%-دى، دەپوزيتتەر بويىنشا – 3،25%، مارجينالدىق نەسيەلەر 4 پايىزدى قۇرادى.

سارسەنبى كۇنى اقش-تىڭ فەدەرالدى رەزەرۆتىك جۇيەسى دە نەگىزگى پايىزدىق مولشەرلەمەنى 25 بازيستىك تارماققا كوتەردى.

بۇدان بولەك، ساۋد ارابياسى ماۋسىم ايىندا ەۋروپا ەلدەرىنە جەتكىزىلەتىن مۇناي باعاسىن كوتەرەتىنى بەلگىلى بولدى. بۇل رەتتە ازيالىق ساتىپ الۋشىلار ءۇشىن جانارماي باعاسى ارزاندايدى. Saudi Aramco مەملەكەتتىك كومپانياسىنىڭ حابارلاۋىنشا، كەلەسى ايدا اقش-قا جەتكىزىلەتىن مۇناي باعاسى وزگەرىسسىز قالادى. ءوز كەزەگىندە Arab Light ماركاسى باررەلىنە 0،5 دوللارعا ارزاندايدى.