قىس ىزعارى سەزىلسە، كولىك جۇرگىزۋشىلەرىنىڭ دوڭعالاقتار الىپ، قامدانا باستايتىن شاعى كەلدى دەگەن ءسوز. Aqshamnews.kz ءتىلشىسى قىس تۇسپەي تۇرىپ جۇرگىزۋشىلەر نەنى ءبىلۋى كەرەك دەگەن سۇراققا جاۋاپ ىزدەپ، كەڭەستەر ۇسىنادى. اۆتوساراپشى ولەگ شەيكونىڭ ايتۋىنشا، قىسقى دوڭعالاقتاردى ايىپپۇل تولەمەس ءۇشىن عانا ەمەس، قاۋىپسىزدىگىڭىز ءۇشىن دە ەرتەرەك الماستىرعان ابزال.
دوڭگەلەكتەردى قاشانعا دەيىن اۋىستىرۋ كەرەك؟
"دوڭعالاقتاردى اۋىستىرۋ ءۇشىن قار جاۋعانىن، مۇز قاتقانىن كۇتۋدىڭ قاجەتى جوق. تەمپەراتۋراعا ءمان بەرگەن ءجون. ەگەر تاۋلىكتىك ورتاشا تەمپەراتۋرا نولدەن تومەن ءتۇسىپ، 5–7 كۇن قاتارىنان ساقتالسا، شينانى اۋىستىراتىن ۋاقىت كەلگەنىن تۇسىنە بەرىڭىز"، - دەيدى شينومونتاج سالاسىندا 30 جىلدان اسا جۇمىس ىستەپ كەلە جاتقان شەيكو.
قىسقى شينا سۋىقتا جۇمسارا ءتۇسىپ، ودان ءارى مايىسقاق بولا ءتۇسىپ، جولدا تەجەگىشتىگىن جاقسارتادى. ال جازعى شينا، كەرىسىنشە، قاتايۋدىڭ اسەرىنەن اسفالت بويىمەن تۋرا "سىرعىپ" كەتەدى. سونىڭ سالدارىنان تەجەۋ جولى ۇزارىپ، اپاتتى جاعدايلارعا الىپ كەلۋى مۇمكىن.
زاڭ نە دەيدى؟
اقبتك-نىڭ 590-بابى، 5-بولىگىنە سايكەس، قازاقستاندا 1 جەلتوقساننان 1 ناۋرىزعا دەيىن كولىكتەر قىسقى شينالارمەن جابدىقتالۋعا ءتيىس. ماۋسىمعا ساي كەلمەيتىن شينالاردى قولدانعاندارعا 5 اەك مولشەرىندە ايىپپۇل سالىنادى. 2025 جىلى ايىپپۇل كولەمى - 19 660 تەڭگە. ءبىر جىل ىشىندە قايتالاپ بۇزعان جاعدايدا سوما ءتورت ەسە وسەدى - 20 اەك، ياعني 78 640 تەڭگە.
كەيبىر وڭىرلەردە، مىسالى استانادا جانە ەلىمىزدىڭ سولتۇستىگىندە، پوليسيا جۇرگىزۋشىلەرگە ماۋسىمدىق دايىندىق تۋرالى ەرتە ەسكەرتە باستادى.
"سۋىق اۋا رايى كۇنتىزبەدەگى قىستان بۇرىن كەلەدى، سوندىقتان 1 جەلتوقساندى كۇتۋ ءقاۋىپتى. تومەن تەمپەراتۋرادا جازعى شينا ءىلىنىسىن جوعالتىپ، كولىكتى باسقارۋ قيىندايدى، ال جكو ءقاۋپى ارتادى"، - دەپ اتاپ ءوتتى ەلوردا پوليسيا دەپارتامەنتى.
قانداي شينا تاڭداعان دۇرىس؟
- قالا ءۇشىن: فريكسيالىق (ياعني "جابىسقاق") شينالار دۇرىس، قار مەن تايعاقتاردا سىرعىپ كەتۋ ءقاۋپى از.
- قالا سىرتى/تراسسا ءۇشىن: شيپتەلگەن شينالار - جۇرگەندە دىبىسى قاتتىراق شىققانىمەن، مۇزدا سەنىمدى جۇرەسىز.
- نەگىزگى قاعيدا: قاۋىپسىزدىكتەن ۇنەمدەمەڭىز. پروتەكتور (شينانىڭ جولمەن جاناساتىن سىرتقى قاباتى - ەسك.) 50%-دان ارتىق توزسا، شينانى اۋىستىرۋ كەرەك. جۇمىسقا قابىلەتتى تەرەڭدىك - كەمى 4–5 مم، ايتپەسە قىسقى شينانىڭ پايداسى شامالى، دەيدى شەيكو.
تاعى ءبىر ماڭىزدى كەڭەس:
- شينانى اۋىستىرعاننان كەيىن مىندەتتى تۇردە بالانسيروۆكا (دوڭگەلەكتىڭ (ديسك + شينا) ماسساسىن تەڭگەرۋ پروسەسى - ەسك.) جانە "دوڭگەلەك گەومەترياسى" تەكسەرىسىن جاساڭىز. ولاي بولماعان جاعدايدا كولىك ءبىر جاققا تارتىپ، جاڭا شينا بىرنەشە ايدا-اق توزىپ كەتۋى مۇمكىن.
- تەڭگەرۋ پروسەسىن ءار 5–10 مىڭ شاقىرىم سايىن قايتالاپ تۇرعان ءجون.