بوستاندىق اۋدانىنىڭ ارداگەرلەرى «تازا قالا. تازا ساياباق» اتتى يگى باستاما كوتەرىپ، كوپكە ۇلگى ءىستى قولعا الدى.
وسىناۋ شارا اياسىندا اۋداننىڭ بەلسەندى قاريالارى قالانىڭ ءبىرشاما جەرىن قاردان تازارتىپ شىقتى. قولدارىنا كۇرەك-قايلا ۇستاعان قاريالاردىڭ قيمىلى تىم شيراق. داۋىستارى دا جارقىن-جارقىن. «كۇنى بويى ۇيدە وتىرعانشا قالامىزدىڭ تازالىعىنا ءوز ۇلەسىمىزدى قوسىپ، جاستارعا ۇلگى كورسەتەيىك دەدىك. ءبىز ءۇشىن الماتى – بارشامىزدىڭ سۇيىكتى قالامىز بولعاندىقتان، ونىڭ كەلبەتىنىڭ كورىكتى بولعانى كەرەك» دەيدى بەلسەندى قاريالار.
«قار تازالاۋشى» قاريالارعا ساياباقتا سەرۋەندەپ جۇرگەن قالا تۇرعىندارى، جاستار جاعى دا قىزىعۋشىلىق تانىتىپ جاتىر. ەندى ءبىر ساتتە جاستار دا قولدارىنا كۇرەك الىپ، اينالانى قاردان تازالاپ، ارداگەرلەرگە كومەك كورسەتۋگە جۇمىلدى.
جانگەلدى سادەن ۇلى، بوستاندىق اۋداندىق ارداگەرلەر كەڭەسىنىڭ ءتوراعاسى:
الماتىنىڭ تازالىعىنا ۇلەسىمىزدى قوسساق دەيمىز
مەملەكەت باسشىسىنىڭ «تازا قازاقستان» باستاماسىنا ءۇن قوسىپ، «تازا قالا. تازا ساياباق» دەگەن اكسيا وتكىزىپ وتىرمىز. مۇنداعى ءبىزدىڭ باستى ماقساتىمىز – جاستارعا ونەگە كورسەتىپ، ۇلگى بولساق دەيمىز. ساياباق تازا بولسا، قالامىز، توڭىرەگىمىز تازا بولادى ەمەس پە؟ سوندىقتان اۋداننىڭ قاريالارى اقىلداسا كەلە، تەك كوكتەم، كۇزدە عانا ەمەس، قىستا دا وسىلاي اكسيا وتكىزىپ وتىرۋدى شەشتىك. اۋدانىمىزدىڭ «وربيتا-1، 2، 3، 4» جانە «تاۋگۇل» ىقشاماۋدانىندا، «بوتانيكالىق باعىندا» قاريالار قار كۇرەپ، بەلسەندىلىك تانىتىپ جاتىر. ءبىزدى ەشكىم ماجبۇرلەپ جاتقان جوق. ءوزىمىز وسىنداي قادامعا بارىپ، قالانىڭ تازالىعىنا ۇلەسىمىزدى قوسساق دەيمىز. ويتكەنى، بۇل ساياباق بارلىعىمىزدىڭ دەمالاتىن، سەرۋەندەيتىن دەمالىس ورنىمىز.
راحىم ءابىلحان ۇلى،
جاستاردى رۋحاني جانە پاتريوتتىق سەزىمگە تاربيەلەۋ جونىندەگى كوميسسيا ءتوراعاسى:
جاستارىمىز ەلى مەن جەرىن، ءتىلىن قۇرمەتتەسىن
ءقازىر مەنىڭ جاسىم 79-دا. «كەزىندە ەڭبەك ەتتىك قوي، ەلگە ەڭبەگىم ءسىڭدى» دەپ قاراپ وتىرعىم كەلمەيدى. ءقازىر قوعامدىق جۇمىستارعا ارالاسىپ، جاستارعا ۇلگى كورسەتىپ ءجۇرمىن. جاستارىمىز ەلى مەن جەرىن، ءتىلىن قۇرمەتتەسىن. ءقازىر ءوزى ءبىر كوشتىڭ سوڭىنان ەكىنشى كوش كەلەدى دەگەن زامان بولدى عوي. ءبىز سول ەكى قوعامدى دا كورگەن ادامدارمىز. جاستارعا دۇرىس تاربيە بەرۋدە جالاڭ سوزبەن ەمەس، ىسپەن ۇلگى بولايىق.
ايجامال كوبدەن،
بوستاندىق اۋدانىنىڭ تۇرعىنى:
سەرگەكتىك ءۇشىن دە قيمىل كەرەك
ساياباققا جاقىن ماڭدا تۇرامىن. وسىندا ءجيى سەرۋەندەيمىن. «تازا قازاقستان» اياسىندا قار كۇرەپ، قالانىڭ تازالىعىنا از دا بولسا ۇلەسىمدى قوسىپ جاتقانىما سونداي قۋانىپ تۇرمىن. نەگە دەسەڭىز، مەن كوپقاباتتى ۇيدە تۇرعاندىقتان، قيمىل-قوزعالىس از. سوندىقتان سەرگەكتىك ءۇشىن دە قيمىل كەرەك دەر ەدىم.