قالامىزدىڭ وقۋشىلار سارايىندا جۇمىسشى ماماندىقتار جىلىنا ورايلاستىرىلعان «Zhas Maman 2025» كاسىپكەرلەر جارمەڭكەسى ءوتتى.
اتالعان ءىس-شاراعا 3 000-نان استام توعىزىنشى سىنىپ وقۋشىسى كەلدى. بۇل جارمەڭكە شاكىرتتەرگە بولاشاق ماماندىقتى تاڭداۋدا باعىت-باعدار بولدى. جارمەڭكەگە 50-دەن استام كوللەدج قاتىستى. ولارعا ءتۇرلى سالاعا ماماندار دايارلاۋعا باعىتتالعان ءبىلىم بەرۋ باعدارلامالارىنىڭ كەڭ سپەكترى ۇسىنىلدى. بۇل باستاما جوعارى سىنىپ وقۋشىلارى ءۇشىن ۇلكەن ماڭىزعا يە. ويتكەنى، ءدال وسىنداي شارا جاسوسپىرىمدەرگە ماماندىق تاڭداۋدىڭ ماڭىزىن تۇسىنۋگە ءارى ولاردى تابىستى مانساپ جولىنا باعىتتاۋعا كومەكتەسەدى.
ءىس-شارانى ۇيىمداستىرۋشىلار – مەدەۋ اۋدانىنىڭ ءبىلىم ءبولىمى مەن № 64-مەكتەپ. «اتامەكەن» پالاتاسىنىڭ قىزمەتكەرلەرى قالالىق ءبىلىم باسقارماسىمەن بىرلەسكەن جۇمىس جوسپارى اياسىندا سپيكەرلەر رەتىندە قاتىستى. سەبەبى، پالاتا وقۋشىلاردى دۋالدى وقىتۋ مەن كاسىپتىك باعدارلاۋ اياسىندا كاسىپورىندارمەن بەلسەندى ءوزارا ءىس-قيمىل جاسايدى. بۇل ءۇشىن جىل بويىنا ءتۇرلى كونفەرەنسيا، «دوڭگەلەك ۇستەل» ۇردىسىندەگى جيىندار، وقۋشىلاردى جۇمىسشى ماماندىقتارمەن تانىستىرۋعا قالا كاسىپورىندارىنا تانىمدىق ەكسكۋرسيالار جوسپارلانعان.
سونىمەن قاتار، پالاتا ءار جاستاعى ادامدارعا جۇمىسشى ماماندىعىن الۋ ءۇشىن قىسقا مەرزىمدى كۋرستار وتكىزۋگە، ءدۋالدى وقىتۋ باعدارلاماسىن ىسكە اسىرۋعا، كاسىپتىك باعدار بەرۋگە بايلانىستى ءتۇرلى ءىس-شاراعا، سونداي-اق كاسىپكەرلەردى سۇرانىسقا يە جۇمىسشى كاسىپتەرىنىڭ مامانىن دايارلاۋعا قولداۋ كورسەتۋدە. بۇل جونىندە فورۋمدا الماتى قالاسى كاسىپكەرلەر پالاتاسىنىڭ كاسىپكەرلەردى قولداۋ جانە دامىتۋ ءبولىمىنىڭ جەتەكشى مامانى جانار يبراگيموۆا ايتىپ بەردى. بۇل شارا كاسىبي باعدار بەرۋ مەن وسى كۇنگى ەڭبەك نارىعىنىڭ سىن-قاتەرلەرىنە دايىن جاستاردى دايارلاۋ ماسەلەسىنە كەشەندى كوزقاراستىڭ ماڭىزدىلىعىن ەرەكشە كورسەتتى.