قىستا كوشە تازالاۋدىڭ تەحنولوگيالىق كەزەڭدەرى جايلى ماماندار ايتىپ بەردى، دەپ حابارلايدى Almaty-akshamy.kz
الماتى قالاسى كوممۋنالدىق ينفراقۇرىلىمدى دامىتۋ باسقارماسىنىڭ دەرەگىنشە، قىس كەزىندە كوشەلەر «الماتى قالاسىنىڭ اۋماعىن اباتتاندىرۋ قاعيداسىندا» (الماتى قالاسى ءماسليحاتىنىڭ VI سەسسياسىنىڭ 2007.12.12 №45 شەشىمى) بەكىتىلگەن تەحنولوگياعا سايكەس تازارتىلادى.
ءبىرىنشى كەزەڭدە قار جاۋعانعا دەيىن («قازگيدرومەت» رمك بولجامىنشا) قۇم تاراتقىشتار بەكىتىلگەن ورىندارعا شىعارىلادى.
قار جاۋا باستاعاننان كەيىن 20-40 مينۋت وتكەن سوڭ جولعا كوكتايعاققا قارسى ماتەريالدار (كقم) سەبىلەدى، ويتكەنى كقم ءسىڭۋى ءۇشىن جەتكىلىكتى قار قالىڭدىعى قاجەت. كقم 3 ساعات ىشىندە سەبىلەدى.
اسفالتقا جابىسپايتىن جاڭا جاۋعان كوبىك قاردى كولىكتەر باعانى تىرمالاپ، سىپىرادى.
ءبىر مارشرۋتتىڭ ۇزىندىعى 45-90 كم، ءبىر باعان مارشرۋتتى 2-5 ساعات ىشىندە ءجۇرىپ وتەدى. قاربالاس ۋاقىتتا باعاننىڭ مارشرۋتتى ءجۇرىپ ءوتۋ ۋاقىتى 1،5 ەسەگە ۇزارادى.
كوكتايعاققا قارسى ماتەريالدار ءاربىر 5 سم قار جاۋعان سايىن سەبىلەدى، سودان كەيىن قار قايتادان كۇرەلەدى. بۇل تەحنولوگيا ساقتالماسا، جولداردا مۇز پايدا بولادى.
كوشەلەردى قاردان تازارتۋدىڭ سوڭعى كەزەڭىندە قاردى ءۇيىپ، شىعارۋ، جول شەتىندەگى جيەكتاستاردىڭ قارى كۇرەلىپ، مۇزدار ۇگىتىلىپ، قار مەن مۇز كەسەكتەرى جينالادى.
قاردى كۇرەۋ مەن شىعارۋ ەڭ اۋەلى ۇلكەن ماگيسترالدىق كوشەلەردە جانە جاياۋ جۇرگىنشىلەر مەن كوپ كولىك جۇرەتىن قالالىق ماڭىزى بار كوشەلەردەن باستالادى. بۇل كولىك لەگىنە، سايكەسىنشە جولداردىڭ ەنىنە، ولاردىڭ ينفراقۇرىلىمدىق ماڭىزدىلىعىنا بايلانىستى.
سوسىن قوعامدىق كولىك ايالدامالارى، جاياۋ جۇرگىنشىلەر وتكەلدەرى، جاياۋ جۇرگىنشىلەر شوعىرلانعان جەرلەر (ءىرى امبەباپ دۇكەن، بازار، تەاتر، مەكتەپ، ەمحانا جانە ت.ب.)، مەتروپوليتەن بەكەتتەرى، اۋرۋحانالاردىڭ قابىلداۋ بولىمىنە كىرەبەرىسى، جەدەل جاردەم ستانسيالارى مەن باسقا دا الەۋمەتتىك نىسانداردان قار شىعارىلادى.
كىرەبەرىستەر، باسپالداقتار، جاياۋ جۇرگىنشىلەر جولدارىنان، كوشە جولدارى مەن تروتۋارلارداعى قار باسىمدىعىنا قاراي جينالادى. بۇدان كەيىن كونتەينەرلىك الاڭدارعا كىرەبەرىستەر، وتكەلدەر مەن اۆتوتۇراقتار، بالالار جانە سپورت الاڭدارى تۇر.
ارنايى تەحنيكا مەن جۇمىسشىلاردىڭ جوعارىدا اتالعان نىسانداردا جۇمىستى اياقتاۋىنا قاراي اۋداندىق ماڭىزى بار كوشەلەر مەن اۋلا ماڭىندا، سونىمەن قاتار، قالانىڭ اكىمشىلىك عيماراتتارىنىڭ كىرەبەرىسىندەگى قار شىعارىلادى.
جاۋعان قاردىڭ كولەمىنە بايلانىستى 3-5 تاۋلىك ىشىندە قالانىڭ نەگىزگى كوشەلەرىنەن قار شىعارىلادى.