قار قۇرساۋىندا قالعان الماتىلىقتى اقمولالىق پوليسەيلەر "دالادا قالدىرمادى"

جولدا قالعان الماتىلىقتى اقمولا وبلىسىنىڭ پوليسەيلەرى قۇتقاردى

الماتى تۇرعىنى اقمولالىق پوليسەيلەرگە قولايسىز اۋا رايىندا كورسەتكەن كومەگى ءۇشىن العىسىن ءبىلدىردى، دەپ حابارلايدى Almaty-akshamy.kz Polisia.kz-كە سىلتەمە.

الماتى قالاسىنىڭ تۇرعىنى اتباسار اۋدانىنىڭ ۋچاسكەلىك پوليسيا ينسپەكتورلارىنا العىس ءبىلدىردى. ءوز حابارلاماسىندا ەر ادام 14 اقپاندا شامامەن ساعات 21:00-دە الماتى-ەكاتەرينبۋرگ اۆتوجولىنىڭ 56 شاقىرىمىندا گازەل اۆتوكولىگىمەن قار قۇرساۋىندا قالىپ قويعانىن جازعان. اۋا رايى ساعات سايىن ناشارلاپ، جۇرگىزۋشى وزدىگىنەن شىعا الماعان. سودان كەيىن ول “102” پۋلتىنە قوڭىراۋ شالدى. ەر ادامدى جەلدىڭ كۇشەيۋى الاڭداتتى. الماتى قالاسىنىڭ تۇرعىنىنا ۋچاسكەلىك ينسپەكتورلارى قانات ءومىرزاقوۆ پەن نۇربولات قادەربەك كومەك كورسەتتى. ارنايى تەحنيكانى كۇتپەي-اق، كۇرەكپەن قارۋلانعان ءتارتىپ ساقشىلارى كولىكتى قۇتقارىپ قالدى.

«پوليسەيلەرگە مەنى قيىنشىلىقتا قالدىرماعانى ءۇشىن العىس ايتامىن. ولار وتە جاۋاپتى ادامدار. پوليسيا مايورى قانات مەنى تۇنەۋ ءۇشىن ۇيىنە الىپ باردى. تاڭەرتەڭ اۋا رايى اشىلعان كەزدە، پوليسيا مەنى تاس جولعا اپارىپ سالدى. ايتپاقشى، وسى كۇنى پوليسەيلەر مەنەن باسقا تاعى ءبىر ەكى جانە ءتورت جاستاعى ەكى بالاسى بار وتباسىن قۇتقاردى»، – دەيدى الماتىلىق.

«جولدا ءارتۇرلى جاعدايلار بولادى. ءبىز باسقاشا جاساي المادىق. سونىمەن قاتار، مەنىڭ جۇبايىم – مەديسينا قىزمەتكەرى، سوندىقتان مەن سياقتى ءاردايىم تۇسىنىستىكپەن قارايدى جانە كومەككە مۇقتاج ادامدارعا قول ۇشىن بەرۋگە دايىن»، – دەپ ءبولىستى مارينوۆ اۋىلدىق وكرۋگىنە قىزمەت كورسەتەتىن ۋچاسكەلىك ينسپەكتور ق.ءومىرزاقوۆ.