ويىن مەكەمەلەرىنىڭ ۇستەمە كىرىسى 2،6 ملرد تەڭگەدەن استى
الماتى وبلىسىنىڭ پروكۋراتۋراسى قاپشاعاي سۋ قويماسى اۋماعىندا ورنالاسقان ويىن مەكەمەلەرىنىڭ قىزمەتىنە تەكسەرۋ جۇرگىزىپ، ءبىرقاتار زاڭبۇزۋشىلىقتى انىقتادى، دەپ حابارلايدى Almaty-akshamy.kz.
پروكۋراتۋرا وكىلدەرى ويىن مەكەمەلەرىنىڭ قىزمەتىن بۇرىن ەشكىم كەشەندى تەكسەرمەگەنىن اتاپ ءوتتى. تەكسەرۋ كەزىندە 2019 جىلدان بەرگى كەزەڭ قامتىلعان.
«كازينو مەن ويىن مەكەمەلەرى الدىن الا ەسەپتەۋلەر بويىنشا ميللياردتاعان تەڭگەگە سالىق تولەۋدەن جالتارعان. قازىرگى ۋاقىتتا پروكۋراتۋرانىڭ تالابى بويىنشا سالىق قىزمەتكەرلەرى جوسپاردان تىس تەكسەرۋلەر جۇرگىزىپ جاتىر، سونىڭ ناتيجەسىندە جالتارۋدىڭ تۇپكىلىكتى سوماسى انىقتالادى»، – دەلىنگەن وبلىستىق پروكۋراتۋرا تاراتقان اقپاراتتا.
قاداعالاۋشى ورگاننىڭ مالىمەتىنشە، ويىن اۆتوماتتارىنىڭ بارلىق زالدارىندا "ويىن بيزنەسى تۋرالى" زاڭنىڭ 12-بابىنىڭ 6-تارماعىندا كوزدەلگەن، ياعني كليەنتكە 95%-دان كەم ەمەس ۇتىس پايىزىنىڭ سايكەسسىزدىگى انىقتالدى.
«شىن مانىندە، ويىن اۆتوماتتارىنىڭ جەكە زالدارىندا كەلۋشىلەردىڭ ۇتىس پايىزى 25%، 30% جانە 51% بولعان. وسى سايكەسسىزدىك ناتيجەسىندە ويىن مەكەمەلەرىنىڭ ۇستەمە كىرىسى 2،6 ملرد تەڭگەدەن استى، بۇل قاراجات مەكەمە كليەنتتەرىنىڭ ۇتىسى بولۋى ءتيىس ەدى»، - دەلىنگەن حابارلامادا.