ءىرى بيزنەس قانت تاپشىلىعىنا شىداسا دا، كوفەحانا مەن كونديتەرلىك دۇكەن سياقتى شاعىن كاسىپكەرلەر قاتتى قينالىپ جاتىر.
رەسمي مالىمەتكە سايكەس، 60 مىڭ قوعامدىق تاماقتانۋ ورىندارى قيىن جاعدايعا تاپ بولدى، دەپ حابارلايدى Almaty-akshamy.kz «حابار 24» ارناسىنا سىلتەمە جاساپ.
قازاقستاندا قانتتىڭ باعاسى شارىقتاپ كەتتى. سونىڭ سالدارىنان مىڭداعان كاسىپكەر بانكروت بولۋى مۇمكىن.
ءدامحانا مەن مەيرامحانالار پاندەميا كەزىندە ءبىراز كليەنتتەن ايىرىلىپ قالدى. ال قانت قىمباتشىلىعى جىعىلعان ۇستىنە جۇدىرىق بولدى. كەيبىر ايماقتاردا قانت مۇلدەم جوق، يا بولماسا، باعاسى ۋداي.
بيزنەسمەندەرگە تاماق اقىسىن كوتەرۋگە بولاتىن ەدى. ءبىراق ولاي ىستەسەك، كليەنتتەردەن ءبىرجولا ايىرىلامىز دەيدى.
«بۇگىندە اس مازىرىندەگى تاعامداردىڭ 90 پروسەنتىندە قانت قولدانىلادى. ناننان باستاپ ەت جانە تاعىسىن تاعى. ماريناد بار، سان الۋان سوۋستارعا دا قوسادى. ءقازىر قانتتىڭ باعاسى كوسموس بولىپ كەتتى عوي. كەلىسىنە 800-900 تەڭگە سۇرايدى. ال بىزگە باعانى كوتەرگەن ءتيىمسىز. سەبەبى پاندەميا كەزىندە ونسىز دا كليەنتتەردىڭ 30 پروسەنتى كەتىپ قالدى»، - دەيدى قوعامدىق تاماقتانۋ قاۋىمداستىعى ءتوراعاسىنىڭ كەڭەسشىسى ۆەرونيكا نۇرپەيىسوۆا.
ءىرى بيزنەس قانت تاپشىلىعىنا شىداسا، كوفەحانا مەن كونديتەرلىك دۇكەن سياقتى شاعىن كاسىپكەرلەر قاتتى قينالىپ جاتىر. ولارعا كۇن سايىن شامامەن 100 كەلى قانت كەرەك. سول سياقتى ناۋبايحانالارعا دا ايىنا كەم دەگەندە 500 كەلى قانت قاجەت. ال ونىڭ باعاسى كۇرت كوتەرىلگەننەن كەيىن ميلليونداپ اقشا شىعارۋعا تۋرا كەلىپ وتىر.
«ءبىز بانكروتتىق جاعدايعا تاپ بولدىق. شيكىزات جوق، جۇمىس جوق. ەندى نە ىستەيمىز؟ بۇگىن بە، ەرتەڭ بە، جابىلۋىمىز مۇمكىن. ءونىم جاسايتىن شيكىزات جوق. ءيا، باعانى كوتەرىپ، سونىڭ ەسەبىنەن قانت الساق تا بولاتىن ەدى. الايدا ونداي جاعدايدا جاي ناننىڭ ءوزى 500 تەڭگە بولادى، ال قارابيداي نانى 1000 تەڭگە بولىپ كەتەدى»، - دەيدى كاسىپكەر ەكاتەرينا ۆاسيليەۆا.
اۋىل شارۋاشىلىعى ءمينيسترى ەربول قاراشوكەيەۆ كۇزگە قاراي جاعداي تۇزەلەدى دەپ وتىر. ءبىراق ءقازىردىڭ وزىندە قانتتىڭ ەڭ تومەن باعاسى شامامەن ءبىر كەلىسى 595-600 تەڭگە بولۋى قاجەت ەكەن.
ال ساۋدا جانە ينتەگراسيا ءمينيسترى باقىت سۇلتانوۆ ەكى اپتا بۇرىن ەكى ساۋدا جەلىسىنەن ءبىر كەلى قانتتى 470 تەڭگەگە ساتىپ العان.
«ءقازىر ول جەلىدە 480-نەن ساتىپ جاتىر»، - دەيدى سۇلتانوۆ.