ءماجىلىستىڭ جالپى وتىرىسىندا ۇلتتىق ەكونوميكا ءمينيسترى الىبەك قۋانتىروۆ قاڭتارداعى تارتىپسىزدىكتەر كەزىندە زارداپ شەككەن كاسىپكەرلەرگە قولداۋ كورسەتۋ شارالارىن ءتۇسىندىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەملەكەت باسشىسى قاڭتار ايىنداعى وقيعالار بارىسىندا كەلتىرىلگەن زالالدى وتەۋ، بيزنەسكە جاردەم كورسەتۋ تۋرالى تاپسىرما بەردى. اتالعان جۇمىس بارىسىندا سالىق سالۋ ماسەلەلەرى دە بار. سوندىقتان الىنعان وتەماقى سوماسى بويىنشا كاسىپكەرلەردى سالىق مىندەتتەمەسىنەن بوساتۋ ماقساتىندا وسى ماسەلەنى رەتتەۋ نورمالارى ۇسىنىلادى»، - دەدى ءا.قۋانتىروۆ.
سونىمەن قاتار ول ينتەرنەت سالاسىنداعى سالىق سالۋ جۇيەسىنە قاتىستى ۇسىنىسىن ايتتى.
«ينتەرنەتكە قولجەتىمدىلىكتى كەڭەيتۋ ءۇشىن جاڭا تەحنولوگيالار كوبىرەك قولدانىلىپ جاتار. سونىڭ ءبىرى – گەوستاسيونارلىق ەمەس سپۋتنيكتىك بايلانىس جۇيەلەرى. سالىق كودەكسىندە وسىنداي بايلانىس ءتۇرى ءۇشىن 1 ايلىق ەسەپتىك كورسەتكىش مولشەرىندە تولەم بەلگىلەۋ ۇسىنىلادى»، - دەدى مينيستر.
ءماجىلىستىڭ وسى جالپى وتىرىسىندا سالىق كودەكسىنە وزگەرىستەر ەنگىزۋ جونىندەگى قۇجاتتى قاراۋ كەزىندە ەلىمىزدە پايدالى قازبالاردى ءوندىرۋ سالىعىنىڭ كولەمى ارتاتىنى ايتىلدى.