قالامىزداعى رەسپۋبليكا الاڭى 13 مەكەنجايىندا ورنالاسقان بيزنەس-ورتالىقتى جوندەۋ-قالپىنا كەلتىرۋ جۇمىستارى قارقىندى جۇرگىزىلۋدە، دەپ حابارلايدى اlmaty-akshamy.kz.
عيماراتتىڭ سىرتىنا ارنايى قورعانىش ماتا جابىلعان، ىشكى قۇرىلىس جۇمىستارىنىڭ جۇرگىزىلىپ جاتقانىنا شامامەن ءبىر جىلعا جۋىقتادى.
2022 جىلعى قاڭتاردا الماتىدا بولعان قايعىلى وقيعالار كەزىندە قيراعان عيماراتقا كۇردەلى جوندەۋ جۇمىستارىن «قازسترويسەنتر» ج ش س مەردىگەرلىك كومپانياسى جۇرگىزەدى.
اتالعان ج ش س وكىلدەرى قازىرگى ۋاقىتتا نىساندا جوندەۋ جۇمىستارى جۇرگىزىلىپ جاتقانىن «ۆەچەرنىي الماتى» گازەتىنىڭ تىلشىسىنە ايتىپ بەردى. ەكىنشى، ءۇشىنشى جانە جوعارعى قاباتتاردا قاتتى ىستانعان قابىرعالار مەن بوس تەرەزەلەردىڭ ورنى كورىنەدى. قاسبەتتەر مەن سىرتقى جۇمىستاردى جۇرگىزەتىن قۇرىلىسشىلاردىڭ مىندەتى - تەرەزەلەردى اۋىستىرىپ، قاسبەتتىڭ قاتتى زاقىمدانعان جەرلەرىن قالپىنا كەلتىرۋ.
نىساندى قالپىنا كەلتىرۋ جۇمىستارىمەن ارنايى شەبەرلەر جانە ينجەنەرلەر توبى، بارلىعى 30-دان استام جۇمىسشى اينالىسىپ جاتىر. جوندەۋدى جاۋاپكەرشىلىگىنە العان قۇرىلىسشىلار جوسپارلانعان جۇمىستاردى بەلگىلەنگەن مەرزىمدە – وسى جىلدىڭ جەلتوقسانىندا اياقتاۋعا ءسوز بەرىپ وتىر.
ەستەرىڭىزگە سالا كەتەيىك، 2022 جىلدىڭ قاڭتار ايىندا جاڭاوزەن قالاسىنداعى گاز وندىرەتىن ونەركاسىپ قىزمەتكەرلەرىنىڭ نارازىلىق اكسيالارىنان كەيىن سۇيىتىلعان گاز باعاسىنىڭ وسۋىنە بايلانىستى قازاقستاننىڭ باسقا وڭىرلەرىندە دە جاپپاي تولقۋلار مەن تارتىپسىزدىكتەر باستالعان بولاتىن.
الماتىدا 2022 جىلعى 4-5 قاڭتاردا ورىن العان نارازىلىق سوڭى جاپپاي تارتىپسىزدىككە، ونىڭ ىشىندە ۇكىمەتتىك مەكەمەلەرگە، اكىمدىك عيماراتتارىنا، ىشكى ىستەر ورگاندارىنا، پروكۋراتۋراعا جانە باسقا دا مەملەكەتتىك ورگاندارعا، سونداي-اق كاسىپكەرلەردىڭ دۇكەندەرىنە، بانكتەرگە، كەڭسەلەر مەن قويمالارعا جاسالعان شابۋىلدارعا ۇلاستى. قۇقىق قورعاۋ ورگاندارىنىڭ قىزمەتكەرلەرىنە شابۋىلدار، اتىس، اۆتوكولىكتەر مەن عيماراتتاردى ورتەۋ، توناۋ سياقتى تارتىپسىزدىكتەر دە ورىن الدى.
قالا اكىمدىگىنىڭ عيماراتى قيراتىلىپ، ورتەلدى. باسقا نىساندارمەن بىرگە ەلىمىزدىڭ جەتەكشى تەلەكومپانيالارىنىڭ كەڭسەلەرى ورنالاسقان رەسپۋبليكا الاڭى 13 بيزنەس-ورتالىعىنىڭ عيماراتى دا زارداپ شەكتى. رەيدەرلەر مەن توناۋشىلار عيماراتتى تالقاندادى، قىمبات جابدىقتاردى قيراتتى، تەلەارنالاردىڭ قىزمەتكەرلەرىن ۇرىپ-سوقتى. سونىڭ كەسىرىنەن بۇكىل قۇرىلىمعا وراسان زيان كەلدى. بىرنەشە كۇننەن كەيىن قالا مەن ەلدەگى ءتارتىپ قالپىنا كەلتىرىلدى.
«اتامەكەن» ۇلتتىق كاسىپكەرلەر پالاتاسىنىڭ دەرەكتەرى بويىنشا، تەك الماتىدا بولعان تارتىپسىزدىكتىڭ زالالى 92،4 ملرد تەڭگە بولعان.