قاڭتار ايىنداعى ۇبت-نىڭ ءبىرىنشى اپتاسىندا 31 مىڭعا جۋىق ادام تەست تاپسىردى.
شەكتى بالدى 60%-عا جۋىق تالاپكەر جينادى. تەستىلەۋ ناتيجەسى بويىنشا ورتاشا بالل 58 بالدى قۇرادى. ەڭ جوعارى بالل – 136، ونى تۇركىستان وبلىسىنىڭ وقۋشىسى جينادى، دەپ حابارلايدى aqshamnews.kz.
تەستكە قاتىسۋشىلاردىڭ 69،3%-ى قازاق تىلىندە، 30،6%-ى ورىس تىلىندە، 27 ادام اعىلشىن تىلىندە تەستىلەۋدەن ءوتتى.
تالاپكەرلەردىڭ باسىم بولىگى، اتاپ ايتقاندا، 18،2%-ى «ماتەماتيكا-فيزيكا» پاندەر كومبيناسياسىن تاپسىردى. 13،5%-ى «بيولوگيا-حيميا»، 13،3% «شىعارماشىلىق ەمتيحان» كومبيناسياسىن تاڭداعان. ەڭ از تاڭدالعان كومبيناسيا – «حيميا-فيزيكا»، ونى 55 ادام تاپسىرعان.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا قاڭتار ۇبت-سىنا 101 تالاپكەر قاتىستى.
تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياسياعا بەرە الادى، بۇل جاعدايدا سەرتيفيكات اپەللياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
قازىرگى تاڭدا 71 ادامنىڭ ناتيجەسى جويىلدى. ونىڭ ىشىندە 37 تالاپكەر سمارتفون جانە شپارگالكا سياقتى تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى، ال تەستىلەۋ كەزىندە ەرەجەلەردى بۇزعانى ءۇشىن اۋديتوريادان 34 ادام شىعارىلدى. وزگە تۇلعالار انىقتالعان جوق.
ايتا كەتسەك، 2025 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.
ەستەرىڭىزگە سالا كەتسەك، قاڭتار ۇبت-سى 13 قاڭتار مەن 10 اقپان ارالىعىندا وتەدى. تەستىلەۋگە قاتىسۋعا 167 مىڭعا جۋىق تالاپكەر نيەت بىلدىرگەن.