پرەزيدەنت حالىقتان ەشتەڭەنى جاسىرىپ قالمايدى - بەرىك ءۋالي
مەملەكەت باسشىسى قاڭتار وقيعاسى بويىنشا الدىن الا تەرگەۋ جۇمىستارىنىڭ قورىتىندىلارىن ناۋرىزداعى قازاقستان حالقىنا جولداۋىندا جاريالايدى. بۇل تۋرالى ق ر پرەزيدەنتىنىڭ باسپا ءسوز حاتشىسى بەرىك ءۋالي Facebook پاراقشاسىندا جازدى، دەپ حابارلايدى Almaty-akshamy.kz.
قاسىم-جومارت توقايەۆ «Qazaqstan» تەلەارناسىنا بەرگەن كەشەگى سۇحباتىندا ايتقانىنداي، حالىقتان ەشتەڭەنى جاسىرىپ قالمايدى. بارلىق اقپارات جاريا ەتىلەدى. ءقازىر ءتيىستى ورگاندار اۋقىمدى تەرگەۋ جۇمىستارىن جۇرگىزۋدە. بۇعان ءبىراز ۋاقىت كەرەك.
"پرەزيدەنت سۇحبات بارىسىندا اتاپ وتكەندەي، قوعامداعى ەڭ ماڭىزدى ماسەلە – زاڭ ۇستەمدىگى. ءدال وسى قۇقىقتىق پرينسيپ نەگىزىندە قاڭتار وقيعاسى بارىسىندا ۇستالعان ازاماتتاردىڭ جاۋاپكەرشىلىك ماسەلەسى شەشىلەدى. ولاردىڭ باسىم كوپشىلىگىنىڭ جازاسى جەڭىلدەتىلگەنى ءمالىم. جۇزدەگەن ادام تەرگەۋ يزولياتورىنان بوساتىلدى. قاماۋداعى ازاماتتاردىڭ قۇقىقتارىن قورعاۋ جۇمىستارى جۇرگىزىلىپ جاتىر. قۇقىق قورعاۋ ورگاندارى قىزمەتكەرلەرىنىڭ زاڭسىز ىس-ارەكەتتەرىنە بايلانىستى دا تەكسەرۋ جۇرگىزىلۋدە. سونىمەن قاتار اۋىر قىلمىس (كىسى ءولتىرۋ، توناۋ، قاراقشىلىق جانە ت.ب.) جاساعاندار زاڭعا سايكەس جازاعا تارتىلادى. پرەزيدەنت ناۋرىز ايىنىڭ ورتاسىندا جاسايتىن جولداۋىندا ساياسي رەفورمالار بويىنشا ءوز باعدارلاماسىن ۇسىناتىنىن ەسكە سالامىز. سونداي-اق مەملەكەت باسشىسىنىڭ كەشەگى سۇحباتى كورەرمەن قاۋىمنىڭ زور قىزىعۋشىلىعىن تۋعىزعانىن اتاپ وتكىم كەلەدى"، -دەپ جازدى باسپا ءسوز حاتشىسى.
بۇل ەلىمىزدىڭ اقپارات كەڭىستىگىندەگى ماڭىزدى تاقىرىپقا اينالىپ ۇلگەردى دەپ ايتۋعا بولادى. وعان الەمنىڭ جەتەكشى اگەنتتىكتەرى بەلسەندى تۇردە سىلتەمە جاساۋدا. قاسىم-جومارت كەمەل ۇلى قاتتى سۋىق تيگىزىپ العانىنا قاراماستان، بەرگەن ۋادەسىندە تۇردى. «پرەزيدەنت وتانداستارىمىزدىڭ اتالعان ماسەلەگە ەرەكشە الاڭداپ وتىرعانىن ەسكەرىپ، ۇلتتىق تەلەارنانىڭ تىلشىسىنە بەرەتىن سۇحباتىن كەيىنگە شەگەرمەدى»، - دەلىنگەن جازبادا.