77 ادامنىڭ جازا مەرزىمى قىسقارتىلدى
قاڭتارداعى جاپپاي تارتىپسىزدىكتەن كەيىن قىلمىستىق ايىپ تاعىلعان 1071 ازامات راقىمشىلىققا ىلىكتى. بۇل تۋرالى ق ر باس پروكۋراتۋراسى 1 قىزمەت باستىعىنىڭ ورىنباسارى ەلدوس قيلىمجانوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بيىل 3 قاراشادا قاڭتارداعى جاپپاي تارتىپسىزدىك كەزىندە قىلمىستىق قۇقىق بۇزۋشىلىق جاساعان ادامدارعا قاتىستى «راقىمشىلىق تۋرالى» ق ر زاڭى كۇشىنە ەندى. ءقازىر 1 071 ادامعا راقىمشىلىق جاسالدى. اتاپ ايتقاندا، سوتقا دەيىنگى تەرگەۋ بارىسىندا ورتاشا اۋىر قىلمىس جاساعان 8 كۇدىكتىگە قاتىستى ءىس توقتاتىلدى. سول سياقتى سوت شەشىمىمەن 9 ادامعا قاتىستى قىلمىستىق ءىس توقتاتىلىپ، 77 ادامنىڭ جازا مەرزىمى قىسقارتىلدى. ودان بولەك، 902 سوتتالۋشىنىڭ جازاسىن وتەۋ مەرزىمى ازايدى. ونىڭ ىشىندە 827ء-ى ەسەپ بەرەتىن پروباسيا، ال 75 قىلمىسكەر جازادان بوساتىلدى. قاراشادا راقىمشىلىق اكتىسىن قولدانا وتىرىپ، باس بوستاندىعىنان ايىرۋ ورىندارىنان 60 ادام، ال پروباسيالىق باقىلاۋدان 68 ادام بوستاندىققا شىقتى»،- دەدى ەلدوس قيلىمجانوۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
بۇعان دەيىن باس پروكۋراتۋرا وكىلى قاڭتار وقيعاسى كەزىندە بەيبىت تۇرعاندار مەن پوليسەيلەرگە ۇيىمداسقان تۇردە شابۋىل جاسالعانىن مالىمدەگەن ەدى.