بۇل ماسەلە ۇكىمەتتىڭ ەرەكشە باقىلاۋىندا.
قاڭتار وقيعاسى كەزىندە قازا بولعان كۇشتىك قۇرىلىم قىزمەتكەرلەرىنىڭ وتباسىنا پاتەر بەرىلەدى. بۇل تۋرالى ءماجىلىستىڭ جالپى وتىرىسىندا ۇكىمەت باسشىسىنىڭ ورىنباسارى ەرالى توعجانوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
وسى ورايدا ول باسپانامەن قامتاماسىز ەتۋ ماسەلەسى ۇكىمەتتىڭ ەرەكشە باقىلاۋىندا ەكەنىن اتاپ ءوتتى.
«بارشاسىنا بەلگىلى، قاڭتارداعى قايعىلى وقيعالار كەزىندە كۇشتىك قۇرىلىم قىزمەتكەرلەرىنەن 19 ادام قازا بولدى. ولاردىڭ اراسىندا شەكارا اكادەمياسىنىڭ ءۇش كۋرسانتى دا بار. قازىرگى كەزدە ناقتى شەشىم بار، ياعني 13-ىنە قاتىستى شەشىم قابىلدانىپ، باسپانا بەرىلدى. ءوڭىر اكىمدەرىمەن قالعان التى ادامعا قاتىستى ماسەلەنى تالقىلادىم. وسى ورايدا كۋرسانتتارعا بايلانىستى كوتەرىلگەن ماسەلە دە نازاردان تىس قالمادى. سوندىقتان بۇل ماسەلە 25 ساۋىرگە دەيىن شەشىلەتىن بولادى»، - دەدى ەرالى توعجانوۆ دەپۋتاتتاردىڭ سۇراقتارىنا جاۋاپ بەرە وتىرىپ.
ەسكە سالا كەتەيىك، بيىل ناۋرىز ايىندا الماتى وبلىسىندا قاسىرەتتى قاڭتار وقيعاسى كەزىندە اۋىر جاراقات الىپ، باقيلىق بولعان 4 پوليسيا جانە اسكەري قىزمەتكەرلەردىڭ وتباسىلارىنا باسپانا كىلتتەرى تابىستالدى.